uMthunywa
Mehleli Dube
NGITHE ngibala kumaphepha ndaba ngadibana lendatshana ethi uBulawayo ngelinye lamadolobho ezweni lakithi elithungamela ngobungcitshi obusezingeni eliphezulu, noma nje ezomnotho zingamanga kuhle. Ngijabule kabi, ukuzwa ukuthi idolobho leli laphiwa isicoco embukisweni weTrade Fair osanda kwedlula.
Ngithi halala kuwe Mnumzana kanye lalabo obambisana labo kuleli qhaza. Ngajabula njalo ukuzwa ukuthi wathi, labo abathengisa ezitaladeni bengasathathelwa abakuthengisayo ngamapholisa. Phela laba bantu bayabe bezama ukuziphilisa njalo lezo mali abazithola ngokuthengisa ezitaladeni yizo ababhadala ngazo indleko zikakhansili.
UBulawayo ngelinye lamadolobho okwavalwa khona amafekithali amanengi, inengi labantu lalahlekelwa yimisebenzi ngitsho sibi samapentsheni abo abazange bawathole baziphumela bengelalutho, angani ngumuntu ovela entolongweni. Wena wabahlangula wathi bengahlukunyezwa ngamapholisa kamanisipala noma bengela machence okuthengisa.
Zinengi imuli eziphila ngakho ukuthengisa, phela abathengisayo yibo abalemali, ngoba emankampanini amanengi izisebenzi aziholi. Zilutshwana eziholayo, inengi lihola sekwedlule inyanga ezithize. Ngifisa ukuthi abathengisayo balandele inkuthazo yakho, yokuthi bahlanze lapho abathengisela khona, bathanyele, balahlele lezibi emagabheni ezibi. Nxa bengezwa befuna ukuya ngaphandle, bangamani baquthe nje noma ngaphi kodwa basebenzise izambuzi eziseduze labo. Phela umuntu olendawo ehlanzekileyo kuyamnceda ukuhuga amakhasimende.
Lemigwaqo ngiyabona iyalungiswa, eminengi yakhona isimihle ngithemba lenani lezingozi lizaphunguleka. Kwakungizwisa ubuhlungu ukubona omama abathengisayo bexotshwa ngamapholisa kamanisipala bethathelwa impahla yabo, okumele bayithengise. Ngikhumbula omunye umama wathi bemxotshanisa wawisa usane ayelubelethe, kwasala kancane ukuthi usane lugxotshwe yimota, lwasinda nje ngokuthi usane luvele lulentelezi.
Angikholwa lokuthi izinto ababezithathelwa zazifika emahofisini kamanisipala ukuze bazobhadaliswa ifayindi.
Ngiyazi impilo inzima kuye wonke muntu, kodwa okunye kumele abantu sizwelane njengabomdaka omnyama, njengalokhu okwenziwe nguSodolobho wako Bulawayo, ukuthi axegise imithetho ethize, abantu baphile kungela kuhatanisana, kuyoze kulunge ngoba, phela isintu sithi okungapheliyo kuyahlola.
Kuminyaka ezayo abayabe bephila bazakhuluma ngakho sokuyimbali nje. Mangigqugquzele izakhamizi zakoBulawayo ukuthi okuyimbijana esikutholayo sikuhlephune, ingcosana siyephosela kumanisipala ukuze laye, asiphe abathi ngolimi lwabondlebe zikhanyilanga, ngama “Good services”.
Phela kwamanye amadolobho amanzi akhona ngeke uwanathe ngoba, enuka angani ngamanzi ezikwakweni, asechenyelwe zinyamazana zasendle.
Yikho ngithi ndoda yamadoda.
Ayixabene
Mehleli Dube 0772673682
