uMthunywa
IPHEPHANDABA likazulu njengoba lisaziwa ngokujabulisa uzulu ngokubadibanisa labahlableli abehlukeneyo, lamhlanje lize lomfana osakhulayo osedumile koMthwakazi ngokucula i-hip-hop, njalo ehlukuluza abanye abahlabeleli kumaTop 20 emisakazweni yakoNtuthu.
Umhlabeleli lo osesaziwa kakhulu ngengoma zakhe u-Can’t delela kanye loZiyawa utshengisa ukuba ulekusasa elihle endimeni yomculo. Umhlabeleli lo owaziwa ngokuthi D’Sibbz nxa ufuna ukwazi ngaye ngcono nansi ingxoxo ehlabusayo phakathi kwentatheli kaMthunywa uArnold Ndlovu (AN) lomculi uBongani Sibanda (BS).
AN: Kunjani jahalakithi? Akutsho ukuthi wena ungubani njalo waziwa ngani koNtuthu.
BS: Mina ngingumculi ohlala elokitshini leMakhandeni owenza i-hip-hop ngikoBulawayo ngaziwa kakhulu ebantwini ngebizo elithi D’Sibbz kodwa engalibethwa ngabadala ngelithi Bongani Sibanda. Ngazalwa mhlaka 24 Mbimbitho ngomnyaka ka1997.
Ukungena kwezomculo ngaqala ngomnyaka ka2015 ngaqala ngililunga leqembu elalibizwa ngokuthi Relevant Hip-Hop kodwa ngokubona ukuthi indlela esasisebenzisana ngayo yayilokudonselana ngacina ngitshiya ngazimela ngedwa ngo2017 kuze kube lamuhla.
Okwenza ngacula i-hip-hop yikuthi ngakhula labanewethu ababevele bethanda umculo we-hip-hop njalo babevame ukuwucula umculo lo. Lami-ke ngahle ngakhula ngiwuthanda umculo lo. Mina nxa ngicula ngithanda ukukhangela kakhulu indaba eziphathelana lempilo yami ngiphinde ngikhangele indaba abantu abahlangana lazo empilweni yansuku zonke.
AN: Njengomfana osakhulayo kwezomculo akutshele uMthwakazi mfoka Mdawini ukuthi suke wakhipha idlalade yini.
BS: Okwakhathesi bengingakakhiphi idlalade, sengakhipha ama-singles kusukela ngomnyaka ka2017 langothando engalutholayo ebantwini langendlela ingoma zami ezenza ngayo emisakazweni yeSkyz Metro leKhulumani FM kwangipha igunya lokuthi ngisebenze phezu kwe-mixtape yami ezabizwa “Gold Digger” ezaphuma ngayonale inyanga mhlaka 12 Nkwenkwezi.
Ekukhipheni i-mixtape yami ngizakhangela ukuthwebula amavidiyo ezingoma ezizabe ziku-mixtape, okwakhathesi sengapheka eyodwa eka ‘‘Can’t delela’’ ngibambisane lomhlabeleli njalo owe-hip hop uMawiza.
AN: Njengomculo we-hip-hop ujwayele ukuhambisana lezigxemegxeme abantu abangahambisani lazo, wena njengomhlabeleli uhluke njani kulabanye abasendimeni efana leyakho?
BS: Ngendlela engicula ngayo abantu bayawuthakazelela umculo wami kakhulukazi ngoba ngikhuluma ngento ezibathintayo njalo okwenza ngehluke kwabanye yikuthi emculweni wami angisebenzisi mabala aphuma endleleni ajwayeleke kubahlabeleli be-hip-hop.
AN: Njengomculi akutsho ukuthi bunzima bani ohlangane labo ekuculeni?
BS: Ubunzima obukhona yikuthi koBulawayo balutshwana abasekeli labalandeli be-hip-hop kubuye futhi kube zindaba zemali ngoba kwesinye isikhathi asibhadalwa nxa bengasinxusa emcimbini okunye okukhona yikungabambani njengabahlabeleli be-hip hop ngoba sidonselana phansi.
AN: Eminyakeni emihlanu ezayo uzibona ungaphi Mdawini?
BS: Mina ekuculeni lapha emnyakeni ezayo ngikhangelele ukuba lodumo olukhulu kwezomculo we-hip-hop.
Udumo lwami kumele lufinyelele indawana zonke zomhlaba nginxuswe emicimbini emikhulu ngabahlabeleli be-hip-hop ngibizwe inkosi yomculo we-hip-hop njalo.
