Uncategorized

‘Ngeke ngikhuphe isimbo’. . . Inyanga yabulala ‘utokoloshi’ ngomthanyelo

13 Dec, 2018 - 00:12 0 Views
‘Ngeke ngikhuphe isimbo’. . . Inyanga yabulala ‘utokoloshi’ ngomthanyelo

uMthunywa

Musa Janga
KULENYANGA yakoBulawayo edonsele elinye inina emthethwandaba ilethesa icala lokwehluleka ukubhadala imali engange $500 ngemva kokuba inina leli liyibize emzini ukuzokhupha igundwane elalilicabangela ukuthi ngutokoloshi.

Imbangela yengxabano le yikuthi inyanga le, uPeter Mkotama ekufikeni kwayo emzini wenina leli, uConcilila Moyo ayizange yenze imithanithani ekukhipheni igundwane leli yamane yathatha umthanyelo nje yalibulala.

Inina leli lifunge lagomela ukuthi ngeke linike inyanga le isimbo ngoba uncedo eyayiludinga kayilutholanga nanko phela lodubo lokungayi esikhathini okwesikhathi esingangeminyaka engu-20 lokhu lungakapheli.

Inkundla yeTredgold ngoMvulo izwe ukuthi umetheswacala uConcilia Moyo ubelegundwane elimhluphayo endlini yakhe obekucatshangelwa ukuthi ngutokolokoshe njalo lokhu besekubangele ukuthi kudlule iminyaka engu-20 engayi esikhathini okuyikho okwabangela ukuthi ayedinga usizo kumamangala uPeter Mkotama.

Kubikwa ngemva kokuyadinga uncedo kuMkotama, uMoyo wahamba laye endlini yakhe ukuze kuyelungiswa lokhu okuhluphayo. Ekufikeni kwakhe babona igundwane lelo, umamangala wacela umthanyelo wamane walitshaya lahle lafa.

Ebuzwa emthwethwandaba umetheswacala ubike ukuthi akulalutho olwatshintshayo ngemva kokuncediswa ngumamangala ngakho ngeke abhadale imali le ngoba umamangala kawazi umsebenzi wakhe.

“Wathi efika endlini igundwane laqala ukubhodabhoda ngasengidobha umthanyelo ngamqhubela ukuze alibulale. Ngenza lokhu ngisazi ukuthi akusilogundwane kodwa ngutokoloshe.

“Ngeke ngimbhadale imali ayifunayo ngoba kasebenzisanga muthi ekubulaleni igundwane wamane walitshaya ngomthanyelo engangimuphe wona.

“Phezu kwalokhu lodubo lwami lokungayi esikhathini lokhe lukhona okutshengisa ukuthi kawazi umsebenzi wakhe.

“Waphinda wacela ukuthi abeselaphela abantu endlini yami. Besengizondwa ngabantu ukuthi ngivumelani ukuthi umuntu ongaziyo umsebenzi wakhe asebenzele kimi ngoba banengi akade sebeqalise ukukhala ngaye,” kuchaza uMoyo.

Umamangala ebuzwa ngalokhu uveze ukuthi yena umsebenzi wakhe uyawazi, ngeke enze into angayaziyo njalo babevumelene ngembadalo ye$500 kodwa uMoyo kasafuni layo.

“Wathi efika kimi ezodinga uncedo savumelana imali le, ulamanga ukuthi izinto zakhe azilunganga, yena angasakufuniyo yikubhadala imali yami.

Umantshi obethonisa lelicala uNkosazana Ulukile Nleya udlulisele phambili ukuthoniswa kwecala leli ukuze kube lobufakazi besivumelwano abasibhalelana phansi.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds