uMthunywa
Arnold Ndlovu
BAZABE bethwele intebe abahlabeleli abahlanu bakoBulawayo bekhangelele ukusuka lendondo enkulu kulezinye ngoMgqibelo emkhosini weRoil Bulawayo Arts Awards (RoilBAAs) ozenzelwa eLarge City Hall ngoMgqibelo.
Nxa kukhangelwa imicimbi eminengi yezindondo, indondo ephiwa umhlabeleli owakhipha ingoma ethandwa njalo egidwe kakhulu emnyakeni wonke (Song of the Year) yiyo eyabe iqotshwe ngabanengi.
Nyakenye kumkhosi ofanayo indondo le yathathwa nguMadlela Skhobokhobo ngengoma yakhe ethi;
Ngamnanka uSaMaMoe. Lonyaka umhlabeleli lo akakhethwanga ukuncintisa endimeni le, ye-Song of the Year.
Lonyaka abahlabeleli abancintisela indondo le bagoqela uKhuxxman ngengoma yakhe ethi; Amaloja eyajatshulelwa ngabantu abanengi, kubuye ekaBekezela okuyingoma yothando ethi Bekezela. Omunye wabahlabeleli ozithola encintisana lamadoda wodwa nguSandra Ndebele, yena ungene ngengoma yakhe ancedisana khona loProffesor ethi Lizwile ethandwa kakhulu elizweni langaphadle.
Kukanti abanye abahlabeleli ababili abaseleyo bona bangena ngengoma zabo ezisebenzisa insimbi ze-rhumba umhlabeleli ongumahlekisa futhi uNceku owamangaza uzulu koNtuthu ngengoma yakhe ethi; Vele Angikuzwa kuthi umhlabeleli wokucina osendimeni le nguClement Magwaza oyaziwa kule indima yena ongene ngengoma yakhe ethi Bathi Asoyami.
Abaqoqi bomkhosi lo ozaba khona ngoMgqibelo, banxuse bonke abahlabeleli ukuthi bahlangane ngoLwesine lapho abazadla baphinde baxoxe khona.
Ngaphandle kwalokho kukhangelelwe ukuthi abantu bakoNtuthu bephume ngobunengi babo bazosekela abahlabeleli.
