uMthunywa
Nkosilathi Sibanda
NXA kudingwa umdlali lomqeqetshi abathandana kakhulu kunguqu, akula abedlula uErol Akbay loRahman Kutsanzira!
Umqeqetshi weHighlanders lokaputeni weqembu kukhanya belobudlelwano obenza bazwisisane kuyo yonke imidlalo.
Ukuzwisisana kwalaba ababili sekudale ukuthi ababukeli bakanobhutshuzwayo labahlaziyi bomdlalo bavumelane ukuthi isizatho sokudlala kuhle kweBosso mhlawumbe kuvela ekuthini umqeqetshi uyazi ukwakha ubungane labadlali.
Nxa iHighlanders ihlohlile, uAkbay kayekeli ukujabula lokaputeni wakhe. Lanxa engakholisa labanye abadlali, kubayivela kanci ukuthi akhohlwe ukuxhawula uKutsanzira. Kumidlalo ebukelwe zintatheli zephephandaba likazulu, kuyavela ukuthi bobabili ngabangane boqobo enkundleni.
UKutsanzira osephiwa isikhundla sokukhokhela ithimu endala kulazo zonke wakubika ngesizini edluleyo ukuthi lokhe waqalisa ukutshibilika kunguqu kakaze ahlangane lomqeqetshi okhaliphe njengoAkbay. Ukukhuluma engafihli lumdlali obizwa ngokuthi nguRakhotsha ngabangane bakhe ukuthi umqeqetshi wakhe wenza umdlalo ubelula ngenxa yokukhululeka kwakhe.
“Iqiniso sibili yikuthi ngiyamzwisisa lumqeqetshi. Akusimi ngedwa umdlali ozwisisana lomqeqetshi uAkbay. Sonke eqenjini sikhuluma okuhle ngaye. Ngeke uzwe into embi ekhulunywa ngaye. Siyazigqaja ngaye. Sengidlale ngaphansi kwabaqeqetshi abanengi kodwa lo uphambili. Imbono yakhe yenguqu iyasikhuthaza ukuthi senze ngcono ngaso sonke isikhathi.
“Ungabuza bonke abadlali bazakutshela okufanayo. Ngikubona kubalulekile ukuthi umqeqetshi abengumngane labadlali ngoba kuvusa ukuzethemba eqenjini. Yikho nxa singahlohla sigijimela kumqeqetshi,” kutsho uKutsanzira.
UAkbay yena uhlala ebabaza umdlalo kakaputeni ngaso sonke isikhathi.
Ekhuluma lentatheli ngempelaviki edluleyo, umqeqetshi lo uthe uyayikhwabitha indlela uRahman agijima ngayo.
“URahman ungomunye wabadlali engingathi ngibathembile. Udlala kuhle njalo uyalalela,” kutsho lumqeqetshi esemahofisini eBosso.
Wathi ehlohla ibhola kumdlalo weHighlanders leDynamos, uKutsanzira waqonda ebhentshini labaqeqetshi ukuyajabula loAkbay, anduba abongwe ngabanye bakhe labasekeli abasebetshaya imvokloklo.
Ebuzwa ngebhola alihlohla kulumdlalo, uKutsanzira uthe wazizwa egcwalelwa lidlabuzane.
“Aluba umdlalo waqhubeka, ngangizahlohla amanengi. Kuthe ngokuhlohla ibhola leliyana, ngezwa ngivuka okunye. Kwaba ngelinye lamabhola engingasoke ngafa ngawakhohlwa. Labaqeqetshi balibabaza kakhulu ngoba ngalitshaya ngomfutho.”
