‘NCEDANI BO BAKITHI’

‘NCEDANI BO BAKITHI’

0 331
UKenneth Mhlophe

YiNtatheli kaMthunywa
UMGCINISIHLALO weHighlanders uKenneth Mhlophe usecele umphakathi wakoBulawayo ukuthi ancedise ukuqondisa abadlali asebephenduke amahlongandlebe enkambeni.
Abadala beBosso bacabangela ukuthi abadlali baleliqembu bahlutshwa yizidakamizwa zemihlobo etshiyatshiyeneyo emalokitshini.

Kubikwa njalo ukuba kulehlekana labadlali eselijola labantu abadala abangomasitanda emalokitshini akoBulawayo.

“Iqembu ngelethu sonke. Abadlali basakhula, okuyikho okwenza kubelula ukuthi bahugelwe ukwenza ubungezwa. Asibambaneni njengomphakathi silwisane loSathane ofuna ukudiliza iqembu.

“Nxa abadlali besona, asibaqondiseni. Ungabona umdlali weBosso esenza okungayisikho, phanga usitshele kumbe uhle umqondise khonapho khonapho,” kutsho uMhlophe.

Umgcinisihlalo lo ohlonitshwa kabanzi ngokuba yingcitshi kwezobukhokheli uthe akube ngumlandu wabasekeli labo bonke abasebenzelana leHighlanders ukuthi bavikele abadlali engozini.

Ziphume zagcwala ibhavu indaba zokuganga okwenziwa ngabadlali abasakhulayo laba, okokuthi kucunule lebhodi yeqembu.

UMthunywa lephephandaba leB-Metro kumaviki edluleyo ukhiphe loludaba olungazange luzwakale kuhle endlebeni zabalandeli. Bakhona abalandeli abaphose bazondela amaphephandaba la, becabanga ukuthi angeke kwenze ukuthi abadlali babo begange.

Kulandela lokhu, lomaqhuzu weqembu uNhlanhla Bahlangene Dube wabika engafihli ukuthi sekuvuka umhlambi kazelusile eqenjini.

UMadinda Ndlovu, umqeqetshi, uthe loba kukhona okuhluphayo kubadlali bakhe, usuka asindwe ngoba angeke akhethele abafana abesifazane bokuthandana labo.

“KuHighlanders siyimuli inye. Abasekeli lentathelizindaba balomlandu wokuqondisa, ngitsho labo bonke abathanda iqembu. Kunzima ukukhethela umuntu ukuthi athandane lobani. Lo lalo ulelungelo lokuzikhethela isithandwa sakhe,” kutsho lumqeqetshi.

UNdlovu uqale kakutsha kuBosso ebika ukuba ubumba iqembu labafana abasakhulayo abaleminyaka engaphansi kwe-24, abazenelisa ukuthi balwele ukuthwala inkezo yeligi ngesizini ezayo.

Ukuziphatha kwabadlali ngalindlela kungaphazamisa umsebenzi walumqeqetshi.

SIMILAR ARTICLES

NO COMMENTS

Leave a Reply