uMthunywa
Nkosilathi Sibanda
AKUHAMBI kuhle enkambeni yomqeqetshi weHighlanders uMadinda Ndlovu kulandela ukudliwa kweqembu lakhe kumaviki amabili adluleyo, osekudale insolo kubalandeli baleliqembu ngokukhalipha kwalumqeqetshi.
Kulimpelaviki iHighlanders leYadah Stars, amaqembu omdlalo kanobhutshuzwayo kuligi ephezulu adibana okwesithathu, kudingwa elizaqethula elinye kuhlandla lama semi-final enkundleni yeBarbourfields.
Akubizwa ozwayo eMagumeni ikakhulu kubalandeli beHighlanders asebebone iqembu labo lidonsa imidlalo emibili lihuba ngokunqotshwa kuphela. IBosso icine ukujabula mhla inqoba iDynamos.
Kube zindaba ezinhle kubalandeli besizwa ukuba lumdlalo leYadah uzabe useBarbourfields. IBosso ihlangana labafana abasacathula kuligi enkulu abalokhe belesilonda esibhibhidlayo sokunqotshwa yiTshilamoya kuligi yeCastle.
Pho kuyozala nkomoni ngeSonto, zisithi 23 kuMpandula?
Umqeqetshi weYadah Thomas Ruzive ubikele uMthunywa ukuthi uyomele iHighlanders njalo kasoze avume ukuthi imyangise kathathu.
“Kumele ngiyinqobe iHighlanders kulinkezo sibili. Ngakho njengoba sesihlangana kunkezo yeChibuku, ngizabopha ziqine. Sengibonile ukuthi iqine ngaphi iHighlanders, okutsho ukuthi sengilalo icebo lokuphuma nginqobile eBarbourfields. Ngiyayihlonipha lithimu kodwa angeke ngivume ukunqotshwa yithimu eyodwa kathathu,” kutsho uRuzive ngoLwesibili.
Umqeqetshi weHighlanders uMadinda Ndlovu wavela wayibeka yacaca eyokuthi ikhona inkezo iBosso ezayithwala ngaphandle kweyeligi. Ekhuluma lentatheli ekuqaleni kwalisizini, uNdlovu wathi kakhangelelanga ukubayintshantshu kodwa ufuna ukwakha.
“Inhloso yami yikuthi ngibumbe iHighlanders ezanqoba okuzwayo kumasizini alandelayo. Njengomqeqetshi ngiyafisa ukunqoba okuthile, ikakhulu imidlalo yenkomitsho.”
Kusenjalo, inhlanganiso yePremier Soccer League ithumele umbiko wokuthi umdlalo wakuqala weChibuku ungoLwesihlanu lapho okuzadibana khona intshantshu yalinkezo iHarare City leBulawayo City enkundleni yeRufaro.
Amaqembu la awaqali ukuhlangana. Kuligi yeCastle Lager iHarare City ayikaze idliwe yiBulawayo City.
Lonyaka ziyayibhedela iBulawayo City eqeqetshwa nguBekithemba Ndlovu ongakatholi umklomelo lokhe waphiwa umsebenzi. Imbali yokudlala kwamaqembu la iveze ukuthi iHarare City izavula indlela ifike ku-final yenkezo yeChibuku Super Cup.
Nansi imidlalo yeChibuku Super Cup:
NgoLwesihlanu: Harare City v Bulawayo City (Rufaro)
NgoMgqibelo: FC Platinum v ChapunguCity (Mandava), Ngezi Platinum Stars v Herentals (Baobab), Black Rhinos v Nichrut( National Sports Stadium), Dynamos v Bulawayo Chiefs (Rufaro)
NgeSonto: Highlanders v Yadah Stars (Barbourfields), Caps United v ZPC Kariba (National Sports Stadium), Triangle United v Shabanie (Gibbo).
NgeSonto: Highlanders FC v Ngezi Platinum (Barbourfields).
