uMthunywa
Nkosilathi Sibanda
KULOMBUZO osemlonyeni yabantu abathanda inguqu koBulawayo okumele uphendulwe nguMadinda Ndlovu umqeqetshi weHighlanders.
Iqembu labafana abasakhulayo abika ukuba uyalakha ngesizini ka2018 selikhule laqina okunganani ukuthi lingancintisela ukunqoba iligi yeCastle Lager kulisizini?
Umbuzo uvela ekuthini iqembu leli elaphiwa ibizo elithi ECD alizange liphethe isizini lidlala kuhle. Umqeqetshi lo waphikelela ebika ukuthi ‘uyakha’ lokuthi ngo2019 uzayithwala inkezo yeligi.
Ekufikeni kwakhe, lumqeqetshi wathi umsebenzi wakhe kuBosso ayisiwo wokuvuselela lokulungisisa obekufile.
Abalandeli abaxoxe loMthunywa ngemva komhlangano omkhulu weBosso ngeSonto, bathe bakhathazekile ngokwakha kukaMadinda okungapheliyo.
Umqeqetshi lo uphawule inhlelo zakhe waqonqosela ukuphakanyiswa kwabadlali abasakhulayo. Kumbiko wakhe yikho lapho okuphume umbuzo wokuthi engabe eleqiniso lokuba uzakwenelisa ukuqeda ‘ukwakha’ i-ECD.
Ugcizelele uMadinda ukuthi uzafaka amandla akhe wonke ukufundisa abadlali ngalokhu kanye lokubafundisa isiko lokudlala kwebhola kuTshilamoya. Isiko leli libalisela ukuchaya ibhola kakuhle lokulidlala ngendlela ezajabulisa, isukumise uzhizhi lwabalandeli balithimu.
UMadinda uchasise kwazwakala ukuthi isizatho sokukhetha abadlali abangaphansi kweminyaka engu-23 yikuthi ucabange ngekusasa yeqembu.
Inyathelo likaMadinda leli lizwakala lilihle endlebeni zabalandeli beBosso bona abacina ukunuka inkezo yeligi ngo-2006.
Isizini yalonyaka iqalisa ngoMbimbitho njalo leHighlanders isiphakathi kwamalungiselelo ayo.
Abadlali abakhethwe nguMadinda okwamanje bafika amatshumi amabili lasikhombisa njalo bambalwa abalodumo ngoba basakhula.
Inkuthazo evele kubasekeli beHighlanders iqonqosela ukuthi abadlali kumele badlalele ukuchaza abantu, kodwa bengakhohlwa ukuhlohla.
“Lonyaka uMadinda kazame ukuthi athole inkezo ngoba sesidiniwe ngokuthi asitshele ukuthi uyakha. Sifuna impumela. Yonke into eyakhiwayo iyafika isibanga sokuthi iphele ikhiphe impumela. Kithi abalandeli impumela yikunqoba,” nguLincoln Ndlovu osekela iBosso ehlala eGwabalanda.
Omunye umsekeli uqobo weBosso uNkululeko Tshambo uthe uMadinda kanikezwe isikhathi ukuze afeze inhloso yakhe.
Uthe loba abalandeli befuna impumela ngamehlo abamvu, kumele bakwamukele ukuthi umqeqetshi uyazi akwenzayo.
“Kumele sibekezele, sikholwe ukuthi uMadinda nguye umqeqetshi ozayiletha Emagumeni inkezo yeligi.”
