uMthunywa
Musa Janga
Lokhe zisevalweni izakhamizi zeMagedleni kuWard 1 eGwanda ngalokhu abakucabangela ukuthi yinjuzi ngoba isibonakala ebusuku.
Ekhuluma lentatheli uSobhuku uPatridge Ndlovu ubike ukuthi injuzi le sibonakala ebusuku ngakho kulindwe abakhulu ukuthi bavumele uMphurofethi uDumisani Moyo ababembizile ukuthi azobancedisa enze umsebenzi wakhe
“Sekulesikhathi silinde abakhulu besigaba ukuthi bavumele uMoyo enze umsebenzi wakhe edamu ngoba linjuzi khathesi ayisabonakali emini kodwa sibonakala ebusuku kuphela okutshengisa ukuthi lokhe ilinde ukwenza umsebenzi wayo, kuchaza uMnu Ndlovu.
Ubuye wathi umphurofethi lo sebasize kakhulu ngoba ngaphandle kwenjuzi bekulabanye abavele bekhaliswa yizikhova emizini yabo.
“Ngingathi bengavumela uMphurofethi uMoyo enze umsebenzi wakhe sengenelisa ukuthi akhiphe linto esedamu ngoba abantu balokhe besesaba ukuyakhona nanku phela usencede abanye khonapha esigabeni akade bekhaliswa yizikhova ebezibuya ebusuku zikhale ubusuku bonke phezu kwendlu zabo.
Uphethe ngokuthi ufisa ukuthi abaphathi bavume kulungiswe idamu leli lingabi njengelinye eliseduze labo eselafela abantu kugoqela lomntanakhe usobhuku.
“Kumele kulungiswe kungaze kwaba njengaleli eleMsholomole ngoba lami sengatshiywa ngumntanami efela edamu leli ngakho sithemba bazavuma ukuthi UMoyo enze umsebenzi wakhe,” kuphetha uNdlovu.
