uMthunywa
YiNtatheli kaMthunywa
KAMBE ukhona unozinti owazi ukunamathela ibhola lenyawo njengo Ariel Sibanda?
Umbuzo lo uvela ekuthini lumdlali weHighlanders usencede iqembu lakhe ukuthi linganqotshwa phose kuyo yonke imidlalo. Ukuxegisa kwemvimbi zaleliqembu kumidlalo edluleyo bekutshiya lunozinti esegcekeni kodwa wenelise ukudanisa izitha ngokuvimba ibhola entanjeni.
Iphephandaba likazulu lithole ithuba lokuxoxa lonozinti lo obike ukuba loba eseleminyaka eminengi ekunguqu, useselawo umdladla.
“Angizitshayi isifuba ngokubamba kwami kodwa ngeminyaka esengiyiqedile ngingunozinti, kuba lula ukuthi ngidlale umdlalo wezinga laphezulu,” kutsho lumdlali kuliviki, andubana iqembu lakhe liyedibana leChicken Inn kumdlalo wamatshumi amabili lanhlanu.
Ngesizini edluleyo, unozinti lo wathola inhlonipho ephezulu kuleliqembu lokhe waqala ukulivimbela igedi kusukela esesengumfana omncinyane.
USibanda wabangumdlali owedlula bonke njalo lokhu kwamnikeza isicoco kumkhosi wokubonga abadlali beHighlanders ngomsebenzi abawenze enkundleni kusizini ka2017.
USibanda odume ngelithi “Mangoye” enkambeni yeHighlanders, kulisizini usevale izinti ngci kwehlula ukuthi inengi lamaqembu libhoboze umambule egedini lethimu yezwe lonke.
Ngesizini edluleyo umdlali lo wenelisa ukubamba imbekwa eminengi kumidlalo yeligi kanye lakumkhankaso wenkezo ezibalisa iZNA charity leChibuku Super.
USibanda useqede imidlalo elitshumi lanye engahlohlwa. Kulandela ukudlala kuhle akwenzileyo, unozinti lo kubikwa kumalanga alandelayo uzathola isipho esithile esivela kubasekeli bethimu.
