uMthunywa
YiNtatheli kaMthunywa
KULANDELA ukuzibika phambili kwenduna uVezi Maduna, iqembu leFilabusi United lizazethula emphakathini kulimpelaviki.
Kubikwa kuqoqwe umkhosi omkhulu wokwamukela iqembu, leliqembu elizadlala kuligi ka-Division One esenkabazwe engaphansi kweZimbabwe Football Association. IFilabusi United ngeyakuqala edabuka kulindawo edlala kulesisigaba somdlalo.
Mhla welanga leliqembu lizadibana labafana beHighlanders iBosso 90 enzikini yeFilabusi.
Umgcinisihlalo weFilabusi United uNqobizitha Dube uthe wonke umuntu unxusiwe.
“Sizethula iqembu ngempelaviki. Sithanda ukunxusa wonke umuntu olothando lwenguqu lalabo abazasekela abafana abadlalela iqembu leFilabusi United.”
UDube ubikele iphephandaba likazulu ukuba akaboni lutho olungabaphazamisa ukuthi bangene kuligi ephakemeyo eyePSL ngomnyaka ozayo.
“Siza kuligi le silande ukuzonqoba sibe zintshantshu. Okwamanje sesibuthanise iqula labadlali abatshisayo, abazimisele ukuthi bancintise ku-Division One.”
Ubike ukuba iqembu lasungulwa ngomnyaka ka-2012 kujongwe ukuphakamisa ithalenta likanobhutshuzwayo kwabasakhulayo kulindawo. Kubikwa iqembu leTalen Vision lisekela ngokugcweleyo iqembu leFilabusi United. Umgcinisihlalo lo usebenza gadalala ukuze iqembu liyephambili encediswa nguMongameli uKelvin Ngwenya oseUnited Kingdom, Lameck Ndlovu lo Stanley Dube.
Ngokunjalo uSam Ndlovu ngumqeqetshi weqembu encediswa nguWonder Mpofu.
UDube uthe akulabadlali abalodumo eqenjini labo njalo inengi ngelikade likhona ngesizini edluleyo beqeda bekunombolo yesibili kuligi yeZifa Division Two Pool A esabelweni seMatabeleland South.
“Silethemba kubadlali esilabo. Iqembu ligcwele abadlali esasilabo ngomnyaka odluleyo. Ngabafana abasakhulayo laba.”
