uMthunywa
AMADLALADE aphekwa imihla lamalanga khonapha emzini wamakhosi okutshengisa ukuthi abahlabeleli kulelidolobho baqhubeka besiba banengi. Kule iviki iphephandaba likazulu liliphathele omunye umhlabeleli osevuthise inkundla ngomculo wakulezi insuku, uMuziwandile Khumalo.
Qhubeka ufunda uzizwele kabanzi ngengxoxo eyenziwe phakathi kukaEthel Ncube (EN) loMuziwandile Khumalo (MK).
EN: Sikutshayela ihlombe mfowethu, ngokuba ngumhlabeleli, uzulu uthanda ukwazi ngawe, mchazele ukuthi ungubani, udabuka ngaphi?
MK: Mina ngazalelwa khonapha koBulawayo ngo1992. Ngakhulela eTsholotsho ngaphansi kwenduna uMathuphula. Kumfundo yami yaphansi ngafunda ezikolo ezibalisa eMawabeni Primary leMathuphula Primary kuthi kumfundo yami yaphezulu ngafunda eMzilikazi High School.
EN: Waqala nini ukuhlabela?
MK: Ngaqala ngo2009 ngisesikolo ngisenza ugwalo lwami lwesibili kumfundo yaphezulu. Ngangizitshayela amakatali nje ngizihlabelela ngedwa ngaze ngacina sengisenelisa ukuthi ngibumbe ingoma ngiyihlabele phambi kwabantu.
EN: Sewake wancindezela yini ingoma zakho?
MK: Ye, ngiledlalade lami engalincindezelayo elithi ‘Summer time’ elilengoma ezingu-11.
EN: Kukhona yini lapho osowake wathola khona isicoco.
MK: Ngangena kumncintiswano weVelly World ngathola isicoco sokuhlabela kuhle.
EN: Ngaphandle kokuhlabela kuyini okunye okwenzayo?
MK: Ngisebenzela inkampani yamagqwethwa.
EN: Njengoba usebenza usithola njani isikhathi sokuhlabela wena uvukela emsebenzini?
MK: Kangisebenzi malanga onke, ngempelaviki kangisebenzi ngakho ngithatha leso sikhathi ngisisebenzise ukuhlabela lokulolonga izingoma zami.
EN: Ukhangelele ukwenzani kuwonalo umnyaka?
MK: Ngikhangelele ukukhipha elinye idlalade lami ngoNcwabakazi elilengoma ezihlabusayo okwamagama.
EN: Ujayele ukuhlabelela ngaphi izingoma zakho?
MK: Ngijayele ukuhlabelela lapho engiyabe nginxuswe khona emadilini omtshado lakuma-shows.
EN: Nkinga bani obhekane lazo njengomhlabeleli?
MK: Kunzima ukuhlabela uze ucindezele idlalade ngoba kudingeka izikhali zokuncedisa ezifana lamakatali lokunye okudinga imali. Ngikhuthaza abahlabeleli abasacathulayo ukuthi babekezele njalo bangesabi ukuhlekwa ngoba inengi labo libulawa zinhloni licine likhalala umsebenzi. Abazali labo ngiyabakhuthaza ukuthi nxa bebona abantwababo belesiphiwo sokuhlabelela babancedise bathuthukise ithalenta labo. Okokucina ngikhuthaza abahlabeleli ukuthi babhalise kuZimbabwe Music Rights Association ukuze bathole ilungelo lokuhlabela endaweni ezitshiyeneyo ngoba ungatholakala uhlabela ungelamvumo uyathathelwa iziginci zakho zokuhlabela ucine ubuyela emuva.
