uMthunywa
Musa Janga
ABAFUYA inkukhu bacetshiswa ukuthi baxwaye ukuthenga amatsiyane asethengiswa emgwaqweni ngoba ayabe engahlolwanga njalo kubikwa sebebanengi abantu abathenga amatsiyane la becabanga ukuthi ngawenkukhu zesintu ngoba elombala omnyama kodwa isimanga yikuthi nxa zikhula ziba lensiba ezimhlophe.
Ekhuluma lentatheli kaMthunywa uMnumzana Cosmas Muzunde onguLivestock Specialist esabelweni seMatabelaland North ubike ukuthi kujwayelekile ukuthi inkukhu nxa ikhula itshintshe umbala kodwa laba abathengisa amatsiyane phandle bayabe bevele bewapende aba lombala omnyama ukuze athengwe.
“Abalimi bangathengi amatsiyane phandle, kabangene phakathi ezitolo bathenge amatsiyane ahloliweyo. Siyazi ukuthi abanengi bathi intengo yaphandle iphansi kulaphakathi ezitolo kodwa kumele lazi ukuthi okutshiphileyo yikho okudulayo,” kuchaza uMnu Muzunde.
Ubuye wathi inkukhu zesintu (road-runner) yizo esezithengwa kakhulu ngakho labo abathengisa amatsiyane sebethatha loba yiwuphi umhlobo wenkukhu bawupende bathengise.
“Abantu abathengisa emgwaqweni bayathatha eminye imihlobo yenkukhu bayitshintshe umbala ukuze ikhanye angathi ngeyesintu kodwa ngokuya kwesikhathi uyananzelela ukuthi kazikhuli njengenkukhu zesintu.
“Inkukhu lezi kazibekeli njengenkukhu zesintu lokukhula kwazo kwehlukene. Laba abathengisayo benza lokhu ngoba befuna ukuthi ibhizimusi yabo ihambe masinyane,” kuchaza uMnu Muzunde.
Ubuye njalo wafanisa indaba yamatsiyane leyenhlanyelo yomumbu.
“Ukuthenga amatsiyane phandle kufana lokuthenga inhlanyelo yomumbu ebantwini abathengisa phandle. Abantu laba bayathatha umumbu bawufake umbala oluhlaza kumbe obomvu, wena njengomlimi ubusuthenga kodwa umumbu lo ungawuhlanyela uyabona ungakhuli, kwesinye isikhathi lokumila kawumili kungakho ngithanda ukucina ngokuthi kasithengeni impahla yethu yonke njengabalimi ezitolo eziqondileyo,” kuphetha uMnu Muzunde.
