uMthunywa
YiNtatheli kaMthunywa
KULEPHOLISA elitshiye inkamba yeMzilikazi ithithibele ngemva kokuba licele ezinyaweni lisuka enkabeni le lapho akade libotshelwe ukuhlukumeza intombi yayo.
Kubikwa uConstable Ngezi Tawanda osebenzela enkamba yeMzilikazi ubebotshelwe ukutshaya lokubhidliza impahla yentombi yakhe uNyasha Museka ongumamangala ohlala eMakokoba.
Okwenzakalayo yikuthi mhlaka 11 Lwezi ngezikhathi zantambama ngalelolanga umamangala wayehlezi endlini yakhe lapho afonelwa khona yindodana yakhe eyayivakatshele uyise asebehlukanayo lomamangala.
Lokhu akuzange kumphathe kuhle uConst Ngezi ngoba ethi kungani indodana yakhe imfonela isebenzisa ifoni yowayengumyeni wakhe. Kubikwa uNgezi wathukuthela waqala ukubhidliza impahla endlini kamamangala okwabangela ukuthi umamangala acine ewela phezu kwembodlela ezazifile phansi walimala esandleni.
Kubikwa umamangala wenelisa ukuphunyuka wayabika udaba emapholiseni wona ahle alulandela andubana umsolwa abotshwe.
Sebesenkambeni kubikwa amapholisa athi esakhuluma laye uNgezi wahwatsha ingqamu esikhwameni sakhe andubana akhiphe isikipa nango ecela ezinyaweni. Kubikwa amapholisa azama ukumlandela kodwa yena wanyamalala ebunyameni lakhathesi kakabanjwa.
