‘Lala ngoxolo Papa Joe’

‘Lala ngoxolo Papa Joe’

0 304
U Joe “Papa” Maseko

BESILIBELE, sithembele ukuba umthunzi uzahlala ukhona, khepha iNkosi ibone kufanele ukuba aphindele kuye ngoba eseyiphutshile indima yakhe kulo umhlaba.

Ma ungakangitholi ngikhuluma ngomuyi uJoe “Papa” Maseko. Umuyi ubengumculi lomqoqi obesebenzela emzini wakhe eLuveve emsakazweni wakhe weHouse Of Rising Sound.

Lumuzi wavula amasango abaculi abanengi abafana loThorne Laroq owe “RapLab” Khulumani FM, u2Nyce, labanye abafana loMadlela Skhobokhobo leCulture Spears yeBotswana.

Ngike ngaba lethuba lokuxhumana labafowethu abanengi asebenza labo okweminyaka eminengi sakhumbuzana ngemisebenzi yengqwele le, uPapa Joe.

Engimkhumbule kuqala nguDylan Diliza weqembu leStiff eliphansi kweProper Files, eyeKalawa Jazmee.

Iqembu leStiff lidume kakhulu eMzansi ngengoma ethi Umcimbi abayicula loProfessor. Lonyaka basiphekele ingoma yabo ebizwa ngokuthi Ingane KaMma.

UDiliza ube lokunengi okokuchatheka ekhumbula uMaseko ngamenzela khona kwezomculo kusukela ngo 1999, ngensuku zakhe besa liqembu le-kwaito, i-Olova.

Uchaze kabanzi ngokuqala kwakhe uMaseko emfundisa ngomsebenzi wokuqondisa umculo owamvulela iminyango yokuphathisa ekucindezeleni idlalade likamuyi uBeatar Mangethe lelikaSandra Ndebele elakuqala elalilengoma uMama, liqondiswa nguMaseko loVincent Gurure.

Ngesikhathi leso wathola ithuba njalo lokusebenzisana leqembu lezokholo iAblaze, iqembu le-kwaito iSkratch, iStreet Ni*^az eyayilo Mjokojoko osekuSkyz Metro FM kulezinsuku.

Umlobi waze uJoe Maseko kusukela ngesikhathi seJammin’ okuyi Record Stable, njalo esebenzisana leqembu leAchuzi elalikhokhelwa nguUnity MaUzah.

UMaUzah useMzansi khathesi uqhuba ngomculo.

Uthe uzwa ukudana ngesehlakalo lesi echaza kabanzi ngemisebenzi abayenza laye uPapa Joe, egoqela ingoma zomkhankaso abazenzela iNgwebu Breweries.

Ithuba engalitholayo lokumbona okokucina bekuzinyanga ezimbalwa ezedluleyo, ngize ngiye eLuveve ngisiya lalela idlalade likaMadlela Sikhobokhobo uMajazana.

IBulawayo kanye lelizwe jikelele ngempela lilahlekelwe.

Abaculi abafana loWillis Wataffi weAfrika Revenge, umlingisi uOktopus, umlobi omkhulu ongumculi uKaySoul, babonise ukukhathazeka ngesehlakalo lesi.

Umuyi ube lesipho sokusebenza labantu kuhle, njalo ubehlezi engumuntu wamagama ambalwa.

Sithi kwabakoMaseko, silahlekelwe sonke ngubaba, umfowethu, umalume lengqwele yomsebenzi wayo. Alwehlanga kungehlanga . . . Lala Ngoxolo “Papa”, sobonana kwelizayo!

NO COMMENTS

Leave a Reply