uMthunywa
YiNtatheli kaMthunywa
Batsho beqinisile abadala uma bethi kufa ungumthakathi.
Ngesikhathi abasekeli bamaWarriors betshayela iqembu leli ihlombe ngokunqoba kwalo kuChan, kusuke kwehla iyezi elimnyama ngokufa kukaNqobizitha “MaHumpty” Maenzanise.
Ubeleminyaka engu-44 yokuzalwa.
UMaenzanise ukhunjulwa ngabanengi ngebizo aliphiwa ngabanye abadlali elithi MaHumpty.
Iviki yonke le kugcwale lumbiko osutshintshe inengi lethu elilandela inguqu ngenhliziyo.
UMaenzanise ubesetshiyane lenguqu esegcina iguma lebandla leBaptist koBulawayo. Inengi lobosaziwayo benguqu koBulawayo livalelise uMaHumpty ngoLwesithathu emagcwabeni eWest Park. Bezigcwele ingcitshi zomdlalo labakhokheli beHighlanders, iZimbabwe Saints leAmazulu.
Usuku lwamhlaka 16 Nhlolanja alusoke lwafana loba ngawuphi umnyaka kumdlalo wenguqu. Yilo usuku abasekeli bebhola abadabuka inhliziyo, zehla inyembezi ngokuzwa ukuthi ingcitshi kwezenguqu uMaHumpty kasekho.
Iphephandaba likazulu lixoxe lalabo abadlala loMaenzanise abakhulume okunengi ngaye.
“Loba esetshiyane lenguqu, uMaenzanise wayekhuthaza abafana ukuthi bengakhohlwa ukulungisa ikusasa yempilo zabo,” nguWillard Khumalo lo.
Hebert Dick: “Ukudlala laye kwakusenza inguqu ibemnandi. Nxa ungumdlali ulokaputeni onjengaye wawufunda okunengi.”
UMkhuphali Masuku: “Sadlala sonke loMaHumpty. Ngangisesengumfana lapho. Wasifundisa ukuzibamba njengabadlali njalo wenza ukudlalela iAmaZulu kwabamnandi. Sihlulukelwe sibanengi ngokulahlekelwa liqhawe lenguqu. Lala ngokuthula mfowethu, sikholise lawe kulumhlaba, wayihlehla indlela yenguqu,.”
Dazzy Kapenya: “Ubephila impilo yenguqu ezithobile esebantwini esazi ukuba lo ngumdlalo wabantu. Nguye phela owakhokhela iqembu leAmaZulu elalihlupha ngesikhathi sisadlala.
“Akulamdlali, umsekeli kumbe umkhokheli wenguqu obengamazi lundoda.Intatheli zemidlalo lazo bezimhlonipha. Ngesikhathi ngingukaputeni weBosso, nguye owangifundisa ubukhokheli. Wayengesabi ukukucebisa,” kutsho uDazzy Kapenya. UDazzy uqhubeke wathi: “Bekusithi nxa ungambuza ngezigigaba zenguqu akubambe umlomo athi ‘hatshi mafana asikhulume okwakha ibhola singalidilizi.’
“Bekungelula ukuthi ujwayelane laye. Ubezifihla emphakathini isikhathi esinengi.”
UCosmas ‘Tsano’ Zulu: “Ngiyakhumbula ecebisa abadlali abasakhulayo ngobubi bokuthanda izidakamizwa lokuzibonakalisa. Ubeseguqukile esekhonza uNkulunkulu okuzwayo. Kwakusithi engavakatshela kumidlalo yamaligi amancane umbone esekhuluma labafana, lawe uhle ubone ukuba wayekhathazekile ngekusasa yethalenta lenguqu.”
