Kuyini ILIFA?

22 Dec, 2014 - 09:12 0 Views
Kuyini ILIFA?

uMthunywa

Amalungelo lemilandu yethu sonke silo Pumulani Mpofu

Ilifa yimpahla yonke etshiywe ngumufi egoqela izigqoko, izindlu, inqola, ibhara kanye lemota nxa umufi ubekade elayo. Kuqakathekile ukuthi sibekwazi ukuthi lokhu esikubiza ngokuthi lilifa kumele kube yizinto ezisebizweni likamufi kumbe nxa kusebizweni lomunye umuntu kube lesivumelwano esikhona phakathi kukamufi lomuntu yenalowo impahla esebizweni lakhe ngendlela yokulotshwa phansi okuveza ngempela ukuthi impahla le ngekamufi.

Nxa kukhangelwa ilifa elitshiywe ngumufi lezikwelede umufi ayabe elazo kumbe izinto azikweledwa ngabantu lazo ziyabalwa. Indlela ilifa elalisatshiwa ngayo kumbe elaliphathwa ngayo ekadeni lakulezinsuku itshiyene  ngakho sizathi ukuchaza kabanzi ngendlela ilifa elaliphathwa ngayo ekadeni lalendlela eseliphathwa ngayo kulezinsuku ukuze abantu babe lolwazi olujulileyo oluzabenza bengazitholi sebephambana lomthetho ngenxa yokungazi.

Kudala kumbe ngeminyaka edlulileyo  umuntu wayesithi angabhubha impahla zakhe ezinjenge zigqoko lokunye nje alakho kwakuhlanganiswa ngumuntu  omdala oyabe ekhethwe yimuli ukuthi ahlanganise impahla kamufi, emva kwalokhu impahla le yayibotshwa okomnyaka wonke ingathintwa umufi aze abuyiswe ekhaya nxa bekungumuntu oyindoda kwakumelelwa ukuthi umkakhe  aze akhitshwe inzilo njengoba yayikhitshwa ngamalanga ombuyiso.

Impahla yayiphathwa njalo ngoba ikholelwa ukuthi iqakathekile njalo kumele layo iphiwe inhlonipho njengomnikazi ingachitheki nje kumbe ukuvulwa okwakungenza kube nzima ukuthi umufi amukeleke kwabaphansi.

Kungaphela umnyaka impahla yayisabiwa iphiwe indlalifa okuyabe kungumntwana kamufi ongumfana okunguye oyabe embambele induku ngesikhathi engcwatshwa ukuveza ukuba usenguye inhloko yomuzi njengoba uyise eyabe sewatshona njalo enguye ingqabutho. Impahla yayiphiwa indlalifa njengendlela yokuyinika umlandu wokugcina imuli.

Kuyabe kukholelwa ukuthi uzasebenzisa ilifa ukugcina imuli kayise okugoqela abanawakhe kanye lonina. Ilifa lalingaphiwa owesintwana kumbe unkosikazi womufi ngoba kukholelwa ukuthi kungenzakala ayekwenda asebenzise ilifa ukugcina enye indoda atshiye abantwana belamba.

Kwathi ngoba sekunanzeleleke ukuthi ayisizo zonke indlalifa ezisebenzisa ilifa ukugcina unina labanawazo njengoba abanye babevuka umqalaha badle baqede ilifa bancitshe labanawabo ababecina besehluleka ukuqhubekela phambili ngesikolo. Yikho kwasekukhitshwa  umthetho we Deceased Estates Succession Act of 1997. Ngomthetho  lumuntu oyindoda angabhubha  elendlu, umkakhe amthetheyo kumele athole indlu lakho konke okuphakathi kwalindlu, kuthi lokhu okuseleyo akwabelane labantwana bakamufi ngokulinganayo kungelani lokuba abazalwa nguye lumama lokuthi baleminyaka emingaki lokuthi ngabayini inqe bengabantwana bakamufi.

Nxa bebengelabantwana unkosikazi kamufi uyabelana okuseleyo labazali baka mufi. Ngokunjalo nxa kufe umfazi, indoda yakhe kumele ithole indlu lakho konke okuphakathi kuthi lokhu okuseleyo ikwabelane labantwana bakamufi ngokulinganayo. Kuqakathekile ukuthi sibekwazi ukuthi indlu le  unkosikazi kamufi  kumbe umkakhe lapho kubhubhe unkosikazi uyithola nxa kuyikuthi ubehlala khona.

Ngokunjalo nxa indoda ibithethe isithembo unkosikazi munye ngamunye uthola umuzi kumbe indlu lapho abekade ehlala khona kanye lempahla yonke ephakathi. Ngokomthetho lo umuntu angabhubha ilifa lakhe alibotshwa liyabhaliswa emthethwandaba etshiyeneyo.

Nxa umufi ubekade etshade umtshado wakomantshi obizwa ngokuthi ngu chapter 5:11 owawusaziwa ngokuthi ngu chapter 37 kudala, ilifa lakhe libhaliswa e-High Court. Abantu abatshiye belobe amawili kanye lamasotsha labo amafa abo abhaliswa emthethwandaba omkhulu obizwa ngokuthi yi High Court.

Nxa umufi ubekade etshade umtshado wesintu ongabhaliswanga kumbe umtshado wesintu obhalisiweyo ilifa lakhe libhaliswa e Magistrate Court ku room 302. Ekubhaliseni ilifa kufunakala izinto ezilandelayo

Incwadi yokufa  eyiyo eveza ngokumqoka ukuthi umninimpahla sewabhubha

Incwadi yomtshado nxa umufi ubekade etshadile.

Iwili nxa ikhona.

Incwadi zabantwana zokuzalwa ukuze kwazakale ukuthi abantu okumele babe zindlalifa kulifa likamufi bangaki.

Incwadi eziveza ukuthi umufi ngumnini wezinto ezigoqela izindlu kumbe izitolo.

Amabhuku ebhanga.

Enkantolo kuzafilwa ideath notice, nxa kungasayinwa incwadi yokuthi ngempela umuntu usebhubhile kuyabizwa umhlangano ngephephandaba likaHulumende elibizwa ngokuthi yi-Government Gazette ukubiza zonke izihlobo ukuba zibuye zizokhetha umabi welifa obizwa ngokuthi nguexecutor. Umsebenzi ka-executor yikufaka isaziso kuphephandaba, ukuqoqa impahla kamufi lezikwelede  kanye lokwaba ilifa.

Size sihlangane kuviki ezayo

Umlobi uthinteka [email protected]; Laku nombolo ezithi 0773 195 055/ 09- 881508

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds