uMthunywa
YiNtatheli kaMthunywa
KULOMBALISI wesikolo seLobengula High School koBulawayo okucatshangelwa ukuba uxotshwe esikolo lesi ngenxa yokuba yisitabane.
Umbalisi uMelusi Khumalo obesaziwa ngokuthi ‘Khumz’ kubikwa ubeziphatha njengowesifazana okubangele ukuthi axotshwe esikolo lesi ngoba kucatshangelwa ukuthi ulakho ukuphazamisa abafundi ngokwenza kwakhe.
UMthunywa ukhulumisane lomfakazi ongathandanga ukubethwa ngegama yena obike ukuthi umbalisi lo bamazi ngokuba yisitabane ngoba ubehamba lasesikolo egqoke njengowesifazana.
“UMelusi Khumalo ngumbalisi kodwa sicabangela ukuthi yisitabane ngoba ubezihambela esikolo engagqize qhakala egqoke angathi ngowesifazana,” kuchaza umfakazi lo.
Abafundi bakulesisikolo abakhulume loMthunywa esingeke sabetha amagama abo bathe indlela umbalisi lo ayeziphatha ngayo yayingazwisiseki.
“Sasimangala indlela umbalisi uKhumalo ayeziphatha ngayo. Wayegqoka amabhulugwe abambayo njalo ngendlela ayehamba ngayo sasingakhululekanga nxa simbona,” kutsho omunye umfundi oyintombazana.
Omunye njalo umfundi uveze ukuthi abafundi abangabafana babehleka sonke isikhathi nxa bembona.
“Abafana babesithi nxa bembona bemhleke ngenxa yezenzo zakhe.”
Uqhubekele phambili umfundi lo esithi umbalisi lo bacina ukumbona ngethemu yokuqala bezwa ukuthi uxotshelwe ubutabane lobu.
“Sithe sivulela ithemu yesibili kaphendukanga esikolo, sezwa kuthiwa waxotshelwa ubutabane bakhe,” kuchaza umfundi.
Ubuye wathi abafundi abanengi babengasafundi kuhle nxa kuyisikhathi sokufundiswa ngumbalisi lo ngoba bethathekiswa yizenzo zakhe.
“Bekusithi nxa kuyisikhathi sikaKhumz abantwana abanengi bebengezwa akufundisayo sebethathekiswa yikwenza kwakhe,” kuchaza omunye umfundi.
UMthunywa uzame ukuxhumana lomphathisikolo walesi sikolo kwehlula ngoba ucingo lungangeni
Imizamo yokukhulumisana loProvincial Education Director wakoBulawayo yehlule ngoba ubengadobhi ucingo lwakhe.
