uMthunywa
Thokozile Mbedzi
UGATSHA olubona ngezemfundo yaphansi kanye laphezulu soluveze ukuthi lufisa ukuthi abafundi bonke abasezikolo babe lakho okuzabaphilisa nxa sebeqedile izifundo zabo yikho nje lukhuthaza ukuba abafundi bafundiswe imisebenzi yezandla.
UMnumzana Personal Ncube onguEducation Officer esabelweni seMatabeleland North uthe imisebenzi yezandla iyathuthukisa isizwe kwezomnotho njalo imisebenzi le yenza abafundi benelise ukuziphilisa.
UMnu Ncube ukhulume lokhu ebukisa impahla eyenziwe ngomdaka ngabafundi besikolo seFounders High School kumbukiso osanda kwedlula oweZimbabwe International Trade Fair.
“Thina njengogatsha lwezemfundo sihlose ukuthuthukisa ezomnotho kanye lezempilakahle kubafundi kanye lozulu kungakho sifundisa abafundi izifundo zamabala kanye lezezandla ukuze sithuthukise ilizwe.
“Siyananzelela ukuthi abafundi kabafanani yikho nje sibakhuthaza ukuthi benze abakwenelisayo ngezandla zabo ukuze benelise ukuziphilisa nxa sebeqedile izifundo zabo ngasikhathi sinye bethuthukisa ilizwe,” kuchasisa uMnu Ncube.
UMnu Ncube uthe impahla ezenziwe ngomdaka zazisenziwa kudala kodwa khathesi kazisalungiswa elizweni sesithenga kwamanye amazwe.
“Okuhle ngempahla ezenziwe ngomdaka yikuthi kayibi lemitshina esetshenziswa nxa isenziwa elakho ukubangela imikhuhlane ebantwini.
“Umdaka silawo lapha kungakho ukwenza impahla ngawo kwehlisa indleko ezinengi okuzaphathisa ukuthi kuvulwe amankampani kucine kuvuleka amathuba emisebenzi,” kutsho uMnu Ncube.
UMnu Ncube uphethe ngokuthi njengogatsha lwezemfundo bazimisele ukulondoloza imbali yesizwe ngokuvuselela imisebenzi yezandla eyayisenziwa kudala ngokufundisa abatsha imisebenzi le.
