uMthunywa
Ethel Ncube
ZITHABE zimanzi te izakhamizi zeMatopo kulandela ukuvulwa kwekolitshi efundisa imisebenzi yezandla esigabeni lesi.
I-Vocational Training Centre le, eseMatopo High School kubikwa izafundisa izifundo ezigoqela iCommerce, Ornamental Horticulture, Bakery, Business English, Cabinet making, Bookkeeping, Garment Construction, Business Calculation, Applied Art and Design, Computer Operation and Package leEngineering Drawing and Design.
Izakhamizi zesigabeni lesi seziveze ukujabula kwazo ngokuvulwa kwekolitshi le ngokuveza ukuthi zizahambisa abantwabazo abaqeda isikolo ukuze bayefundela imisebenzi yezandla ezabaphilisa.
Kuzwakale ukuba bakhona abanye asebeqede izifundo ze-Ornamental Horticulture okuyikhosi yokuhlanyela amaluba lokunye okokucecisa.
Intatheli ixhumane loMqondisi wekolitshi le, uMnumzana Gardson Sibanda yena oveze ukuthi abafundi bakhangelelwe ukubhala imihloliso yokuqeqetsha ezifundweni zabo ngenyanga kaMfumfu.
“Silabafundi abangu-95 abenza izifundo lapha, kulabatsha abangu-87 kuthi abadala bangu-8 njalo sikhangelele ukuthi babhale imihloliso yabo ngenyanga kaMfunfu khonapha lanxa singaphansi kweJoshua Mqabuko Polytechnic,” kutsho uMnu Sibanda.
UMnu Sibanda uveze ukuthi amakhosi la enziwa ngabadala labancane njalo abanye bafunda emini kukanti abanye bafunda ntambama.
Omunye usobhuku okhulume loMthunywa uveze ukuthi bakhangelele ukuthi abafundi babe banengi ekolitshini le ukuze abadala kanye labatsha abangasebenziyo bathole ulwazi ngemisebenzi yezandla ezabenza baziphilise.
Esinye isakhamizi uBekithemba Dube uveze ukuthi imisebenzi efundwayo izaphathisa isigaba sonke ukuthi sibe lengqubela phambili ngaphandle kokuthi abantu baziphilise lezimuli zabo.
“Siyathaba ngokwethulelwa amakhosi ezandla azaphathisa abantwabethu kanye lesigaba sakithi ukuthi sibe lentuthuko,” kutsho uMnu Dube.
