uMthunywa
Yintatheli kaMthunywa
KUSUKELA ngoMvulo kuviki ezayo kusiya ku-2 Mfumfu abantwana abalenyanga eziyisithupha kusiya kuminyaka engu-15 bazabe bevikelwa kumkhuhlane wendingindi kunye le-rubella.
Ugatsha olubona ngezempilakahle kanye lokondliwa kuhle kwabantwana lukhuthaze abazali kanye labaphathi bezikolo ukuthi babone ukuba abantwana bayavikelwa kumikhuhlane le elakho ukubulala.
Kubikwa uHulumende useqoqe imali engange-$8 miliyoni ukuze isetshenziswe ukuthenga imithi le ezaphiwa abantwana.
Kuhlelo lolu kubikwa omama abazithweleyo labo bazahlatshwa ukuze kuvikelwe ukumemetheka komkhuhlane wendingindi kanye le-rubella.
Uhlelo lokuvikelwa kwabantwana kumikhuhlane le kubikwa luzaqhutshwa lugatsha lwezempilakahle ndawonye lenhlanganiso ezibalisa i-WHO, Unicef, MCHIP, GAVI project kanye lerotary.
Ngalesisikhathi abantwana bazaphiwa njalo iVitamin A supplement.
Indingindi ngumkhuhlane omemetheka masinyane endaweni elabantu abavikelwanga kuwo. Emhlabeni jikelele kubikwa kulabantu abangu-20 miliyoni abahlaselwa ngumkhuhlane lo, phakathi kwabo abangu-146 000 bayafa minyaka yonke ngokutsho kwenhlanganiso yeUnited States Centre for Disease Control.
I-rubella yona ngumkhuhlane omemeka kakhulu ebantwaneni kunye labasakhulayo. Igcikwane lomkhuhlane lo liba semoyeni kungakho olomkhuhlane lo angakhwehlela kumbe angathimula ulakho ukuthelela omunye.
Ngokutsho kweWHO akula muthi wokwelapha i-rubella kodwa uyenelisa ukuvikelwa.