uMthunywa
ZiNtatheli zikaMthunywa
ZILOKHE ziphethe izibindi ngezandla izakhamizi zeCowdray Park, koBulawayo kulandela ukuvezwa kwamantombazana amabili okucatshangelwa ukuba abangela izingozi ezenzakala emgwaqweni, ukuzibophela kwabantu kanye lokuchitha imizi yabantu abathetheneyo kulelilokitshi, uMthunywa ukuzwile lokhu.
Impicabadala le ivele ngempelaviki lapho amantombazana la okubikwa angamabele endlela avukelwe ngamadimoni achaza ukuthi ajoyine i-satanism yikho nje ebangela ububi obehlukeneyo kule indawo.
UMthunywa uvakatshele kulelilokitshi kuyonale iviki waxoxisana lelinye inina elithande ukwaziwa ngokuthi MaMoyo nje kuphela wathi lokhu betshe amathe ngemfihlo evezwe ngamantombazana la.
“Ngezwa amathumbu eqanda abantwana abancane beveza imfihlakalo eyesabekayo besithi yibo asebeqede abantu ngokubulala engozini zomgwaqo. Sonke lesi isikhathi besisithi nje ngumoya okhona wokufa kwabantu ezingozini kanti siyazikhohlisa nje, ngama-satanist. Asikwazi lokuthi ibandla lesiPositoli leli lasivelela ngaphi elisivule amehlo.
“Abantu babegcwele benze udwendwe befuna ukuthandezelwa. Amantombazana la athe esekhulekelwe avuka amadimoni baqala ukuchaza ukuthi bona bazinkosi zokufa (gods of death) nxa besemsebenzini wabo,” nguNkszn Moyo lowo.
Uqhubekele phambili esithi bahle babona nje ukuthi ngempela yi-satanism ngoba mhla amalunga amaPositoli la ezokhuleka kwakulomuntu owayezihilele.
“Ama-satanist la achaza njalo ukuthi yibo abenza abantu bazibophele ukuze bathole igazi nanko phela ngeSonto kuthandazwa ukhona owayevele esezihilele. Bathi izingozi zomgwaqo zonke ezenzakala elokitshini leli yibo abazibangelayo. Imitshova iyabhewuka kufe abantu kumbe igxobe abantu.
“Ngesikhathi belokhu bephethwe ngumoya lo baveza ukuba omkhulu wabo kahlali kule indawo, uhlala eQueens Park njalo bona lapha basebenza beliqembu. Abanye babengekho ngesikhathi kuchitheka izitshebo sokuvela imfihlo,” kubika uNkszn Moyo.
Esinye njalo isakhamuzi esikhulume lentatheli uNkosazana Rosina Ndlovu uchaze ukuba lokhe betshaywa luvalo ngodaba lolu.
“Okwalapha kunzima, abantu baphela nje kanti badliwa ngama-satanist shuwa. Amankazana la sithi okwabo yikuthengisa nje imizimba kanti hatshi baphatheka lekubulaweni kwabantu.
“Kasisoli muntu ngoba bazikhulumela sebethandazelwe libandla lesiPositoli elalilapha.
“Baveza njalo ukuba yibo ababangela ukuchitheka kwemizi besebenzisa amandla abo la. Silapha asilankani ikakhulu ngokufa kwabantu. Ngenyanga kuba labantu ababili kumbe abathathu abazibophelayo kungaqedakali ukuthi kuyabe kutheni kanti yimisebenzi ye-satanism.
“Kuhle lamuhla iqiniso sesilazi, sibonga abebandla lamaPositoli ababebhoda besifundisa ngokuthi singendisi abantwana abancane basincedisa ngokusithandazela,” kubika uNkszn Ndlovu.
Iphephandaba likazulu lixhumane lomphurofethi uEmmanuel Mutumwa owayethandazela abantu endaweni le ovumileyo ukuba wayesiza abantu.
“Ukuthandaza ngabathandazela abantu kwaphuma amadimoni amanengi atshiyeneyo engingeke ngitsho ukuthi ubani wathini ngoba ngiyabe sengiphazamisa impilo zabantu.
“Bakhona abaku-satanism, sizaqhubeka sibathandazela ukuze abantu babe lokuthula bahlale kuhle elokitshini leli,” nguMnu Mutumwa lowo.
