uMthunywa
Cornelius Luphahla
LOKHU ziphicekile njalo zizidla amathambo engqondo izakhamizi zesigabeni seEast Junction, eNyamayendlovu ngemva kokuba esinye isakhamuzi sakule indawo sithole ingcwaba eligqitshwe impahla zokugqoka kunye lezikhali ezilegazi kanye lemithi ethile egangeni.
Kucatshangelwa ukuthi impahla ezitholakale engcwabeni leli ngezesinye isakhamuzi sakule indawo nanko phela abantu bathi silazo impahla ezifana xathu lalezi.
Insumansumane le yenzakale kuviki ephelileyo lapho uMnumzana Mishek Sibanda athole khona ingcwaba phakathi kwegusu lilempahla okucatshangelwa ukuba ngezikaVictor Ndlovu lemuli yakhe. Impahla lezi bezigoqela amaphenti amathathu, ibhulugwe, iyembe, isiketi, isikipa, izicathulo, isikipa somntwana lesiketi kanye le-screw driver.
Ebuzwa ngale indaba uMnumzana Mishek Sibanda uveze ukuthi ingcwaba leli ulibone ngesikhathi edinga inkomo eguswini.
“Ngathi ngizihambela ngidinga inkomo phakathi kwegusu, ngabona kuledundulu elenziwe njengengcwaba lafakwa amatshe labuya lathelwa amanzi phezulu. Ngethuka ngoba amangcwaba akithi andawonye ngakho ngasuka ngayabikela usobhuku lezinye izakhamizi sabuyela-ke sayabona, okuyikho esafika sagebha khona,” kuchaza uMnu Sibanda.
Esinye isakhamuzi sakule indawo uMnumzana Mpumelelo Moyo ochaze ukuthi laye wayekhona mhla kugejwa ingcwaba leli uthe bathola impahla ezifana xathu lezesinye isakhamuzi.
“Sathi sisiyabona ingcwaba leli isakhamuzi okuyiso esilempahla ezifana lesazithola zigqitshelwe lapha saphenduka endleleni sathi asikungeni lokhu. Isimanga yikuthi ngesikhathi sigebha lapha sathola impahla ezifana xathu lezazikalo owaphenduka endleleni. Okunye esakuthola phakathi kwengcwaba leli lihloka, i-screw driver kanye lempande ezingaqedakaliyo konke kulegazi.
“Okwamangalisa izakhamizi yikuthi iyembe lebhulugwe kwakufana xathu lokuka-Victor Ndlovu, isiketi lesikipa lakho kwakufana xathu lokomkakhe uNkosikazi Sihle Ndlovu, isikipa njalo lesiketi kwakufana lakho lokomntwana abahlala laye kuthi ihloka lalifana lalelo elalihlala lithwelwe nguNdlovu. Okwasehlula ukukufanisa ngamaphenti kanye le-screw driver kuphela,” kutsho uMnu Moyo.
Ebuzwa ngale indaba uNkkz Ndlovu onguye okucatshangelwa ukuba impahla lezi ngezakhe wale walandula ukuthi indaba le uyayazi.
“Angilankani ngezakhamizi zalapha ezithi yimi engigqibele izigqoko egangeni mina ngingazi lutho. Izigqoko ziyafanana emhlabeni ngakho engxenye kukhona owathenga impahla ezifana lezami wayazigqibela esenzela ukuthi kuthiwe ngezami.
“Okunye njalo izakhamizi lezi zingimangalise ngokuthi zenze umhlangano ngudlu zathumela umfowabo womkami ukuthi azongibuza ngempahla lezo mina ngala. Kuthe kunjalo zangibiza umhlangano suphelile zangibuza ukuba umkami ungaphi ngathi useGoli. Ngemva kwalokho zangikhangela kuphela ngaze ngazihambela,” kulandisa uNkkz Ndlovu.
Ebuzwa ngale indaba usobhuku wakule indawo uMnumzana George Ncube uvumile ukuthi indaba le uyayazi.
“Indaba le ngiyayazi sibili lami ngatshelwa nguSibanda ngale indaba ngasengibiza ezinye izakhamizi saba ngu-11.
Ekufikeni kwethu safika sagebha sathola kulezigqoko, ihloka kanye le-screw driver.
“Noma nje abantu becabangela ukuthi ngezesinye isakhamuzi kodwa kakho okwaziyo ukuthi ngabe kuqiniseke kanganani lokhu. Okusethusayo yikuthi ihloka le-screw driver kwakulegazi, asazi ukuthi leligazi lalingelani.
Ngakho-ke sike saba lomhlangano sikhuluma ngale indaba. Khathesi sikhangelele ukuba siphinde njalo sibonisane ukuthi senzeni singakayisi phambili,” kuphetha uMnu Ncube.
