uMthunywa
AMAQEMBU amane atshova umdlalo kanobhutshuzwayo esiqintini seKezi anxuswe ukuthi ancintisane kumqhudelwano okhangelelwe ukuthi uqhutshwe kulimpelaviki.
Imidlalo le isekelwa ngamadoda amane asebenza eUnited Kingdom aphuma kulindawo abika ukuba akubone kufanele ukuthi ancedise ukuphakamisa ithalenta labafana abasakhulayo endaweni yakibo. Izizalwane zeKezi lezi nguAmkela Dube, Clayton Vundla, Obey Maphosa loSiza Ndebele.
Kubikwa imidlalo le izaqhutshwa minyaka yonke njalo kungenzeka kusekelwe leminye imidlalo engakhwabithwa yintsha yakoBango.
Amaqembu azaphatheka abalisa iSt Joseph’s FC, Mambale, Khalanyoni leBango Swallows. Amaqembu la kubikwa yiwo azimisele okuphezulu ukusebenzisa inguqu ekwakheni umphakathi ongaphansi kwenduna uBango.
Abanqobi bomdlalo bazaphiwa i4 000 Randi. Iqembu elizaphetha lingelesibili lizabuyela ekhaya lithwele i1 500 Randi, elesithathu libanjiswe i250 Randi.
Isikhulumi salumqhudelwano uAmkela Dube utshayele uMthunywa ucingo kuliviki ecela ukuthi abathandi bebhola lenyawo koBango bangene umango bayesekela abafana enkundleni yeBango Semukwe Bridge.
“Singamadoda amane asebenzele phetsheya kolwandle kodwa sidabuka eKezi ngaphansi kwenduna yethu uBango. Inhloso ngemidlalo le yangempelaviki yikubambanisa umphakathi lokukhuthaza ukuthi abantu bakithi basebenzise umdlalo wenguqu ukuze bathole inhlalakahle. Umdlalo wenguqu layo yonke imidlalo, ilakho ukuthi ivikele intsha kubugebengu, idale ukuthi kubelokuzwanana phakathi kwesigaba futhi.
“Ngakho-ke sicela bonke abaseduzane lenkundla ukuthi baze ngobunengi babo bezosekela abafana basekhaya,” kutsho uDube.
