uMthunywa
Yintathelo kaMthunywa
IMINCINTISWANO yokugijima ilokhe isanda koBulawayo nanko phela abagijimayo kuleli sebenxuswe kumjaho omutsha ongamakhilomitha alitshumi, oweLiquor Hub Fun Run.
Umjaho lo uqoqwa ngusomabhizimusi uRaj Modi ngaphansi kwenkampani yakhe iWholesale Centre Liquor Hub esenzikini yedolobho lakontuthu.
Inhloso yokugijima ngeyokuncedisa abaswelayo lokuphakamisa ithalenta lalabo abalesiphiwo.
Kumbiko olotshwe nguModi, umjaho uzagijinywa phakathi kwedolobho, okuyisiqalo kumdlalo wokugijima ngoba imincintiswano eminengi yenzelwa emalokitshini.
UModi uthe umjaho walonyaka uzakuba mhlaka 29 kulinyanga njalo inkampani yakhe isiqoqe ukuthi umncintiswano lo uqhutshwe minyaka yonke.
“Inkampani yeWholesale Centre Liquor Hub izasungula umncintiswano wamakhilomitha alitshumi. Umjaho lo ngowobungane lokukholisa. Kulabanye abazazihambela nje okwamakhilomitha amahlanu ngenhloso yokudingela abaswelayo uncedo oluthile.
“Kusukela kulumnyaka, kuzagijinywa minyaka yonke. Lokhu sikwenzela abampofu njalo sikhangelele ukuthi abalethalenta lokugijima baphathiswe kulomncintiswano,” kubika uModi.
UModi usesekele umdlalo wokugijima imango emide kusukela ngesikhathi elebhizimusi eNkulumane Complex.
Inkokheli yenhlanganiso yeBulawayo Athletics Board uManuel Mpofu usekhulume kabanzi ngobudlelwano obuhle abalabo lamabhizimusi asekela umdlalo wokugijima.
Umqeqetshi weqembu lesizwe kumdlalo wokugijima uPhakamile Lisimati uthe ukusungulwa kwemincintiswano enjengale kwenza kube lula ukuthi abagijimayo balolonge.
“Kuleli akula mincintiswano eminengi. Nxa kuqoqwa imijaho enje kuyasikhuthaza. Loba kungumjaho wokukholisa, abagijimayo bengawusebenzisa ukuthi bahlolisise isiqubu sabo lesikhathi abaqeda ngaso umango.”
Abazagijima kumjaho weWholesale Centre Liquor Hub lo bazangena umango ngehola lesikhombisa ekuseni, kukhangelelwe ukuthi bawuqede ngehola elilodwa.
