Kusungulwa izifundo zabadala esikolo sakoNtuthu

29 Jun, 2017 - 02:06 0 Views
Kusungulwa izifundo zabadala esikolo sakoNtuthu UNkszn Carol Moyo

uMthunywa

Thokozile Mbedzi
NGENHLOSO  yokuthuthukisa ezemfundo isikolo seRobert Tredgold Primary sesisungule izifundo zasebekhulile ezibalisa ukulima imibhida, ukwenza impahla eyenziwa ngamangqongqo kanye lezifundo zamabhuku.

Ekhuluma lentatheli kaMthunywa umphathi walesi sikolo uNkosazana Carol Moyo uveze ukuthi ulwazi kuzifundo zamabhuku kanye lemisebenzi yezandla lumqoka. Uthe uHulumende wathi eletha uhlelo lolu ezikolo labo bahle baluthathela phezulu ukuze bancendisane lozulu kwezemfundo kanye lemisebenzi yezandla.

“Thina njengesikolo sikubone kufanele ukuthi sisungule izifundo lezi nanko phela loluhlelo lwalethwa nguHulumende.

“Isikolo sethu sisendaweni enhle kakhulu ngoba siseduzane labantu abasebenza imisebenzi etshiyeneyo enzikini yedolobho lakoBulawayo kanye labathengisa impahla etshiyeneyo kungakho-ke sikubone kumqoka ukuthi silethe izifundo zokuqeqetsha kanye lezemisebenzi yezandla kuzulu ukuze enelise ukuzifinyelela lula, kutsho uNkszn Moyo.

Uthe bakhethe ukubamba nxa zonke ngoba abantu bephiwe izipho ezitshiyeneyo okutsho ukuthi lo lalo olesifiso sokufunda angabalakho ukukhetha ukuthi ufuna ukuqeqetsha kuziphi izifundo.

“Abanye abafundi sibafundisa ukulima imibhida kuthi nxa bengavuna sithengise isivuno sabo. Isikolo sizuza i10% kuthi enye siyise ekuthuthukiseni izifundo zabafundi bethu okugoqela indleko abahlangana lazo ezifana lemithi yokufafaza izilimo lokunye okunengi. “Abanye sibafundisa ukuthunga besebenzisa amangqongqo ngakho bathunga  impahla zokuceca lezikhwama ezithwalwa ngomama,” kulandisa uNkszn Moyo.

UNkosazana Esma Shoniwa okhokhela loluhlelo uthe ukufundela imisebenzi yezandla kuqakathekile kakhulu ngoba umuntu kasweli ngoba impahla le nxa ithengiswa ilentengo etshiyeneyo ngakho kuyaphathisa kakhulu.
“Ukufundela imisebenzi yezandla kuqakathekile kakhulu ngoba umuntu kasweli okokuziphilisa ngoba impahla lezi zilentengo etshiyeneyo, abathengi balakho ukuthenga abazenelisayo.

“Sithanda ukukhuthaza abantu ikakhulu abazisebenzayo ukuba babuye bathole izifundo ngoba lenhlawulo yakhona incane,” kuphetha uNkszn Shoniwa.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds