KUPHELILE NGOMUDZINGWA

18 Jan, 2018 - 00:01 0 Views
KUPHELILE NGOMUDZINGWA U-ERIC Mudzingwa

uMthunywa

Nkosilathi Sibanda
SEKUSAZIWA ukuthi umqeqetshi omutsha weqembu lenguqu iHighlanders kabafuni abadlali asebekhulile kumkhankaso wakhe wokuvuselela ithumu le kulisizini.

UMadinda Ndlovu uphenduka kuHighlanders elomlandu wokukhuza abafana abasakhulayo njalo inyathelo lakhe lelo yilo elimenza athole inhlonipho kubalandeli abambona enguye umqeqetshi ozavusa iqembu.

Umqeqetshi lo ulodumo lokubumba amaqembu aqinileyo kubadlali abasacathula.

Kulandela ukungena kwakhe emsebenzini ngeviki edluleyo, uMadinda kubikwa ukhethe abadlali abangamatshumi amabili lasikhombisa ahambe labo enkambeni yokulolonga efihliweyo.

Kodwa, uEric ‘Tsiba’ Mudzingwa, uSimon ‘Yola’ Munawa, Ralph Matema, Tendai Ngulube loAllen Gahadzikwa kabahambanga. Izivumelwano zabadlali laba leqembu ziphele ngoMpalakazi.

Abadlali abakhethwe nguKhathazile babalisa ihlekana labasakhulayo, inengi elileminyaka engaphansi kwe-22 yokuzalwa.

UMudzingwa ukhutha ugatsha enkambeni kaMadinda ngesikhathi abalandeli becabanga ukuthi uzaqedisa umnyaka wakhe wokucina eseqenjini.Lumdlali lomunye wakhe uMunawa babalelwa kulabo asebahlala isikhathi eside bekuHighlanders. UMudzingwa ubesetshove iminyaka engu-17 edlalela iBosso.

UMudzingwa engabe ekhitshelwe ukuthi usemdala njalo angeke adlale ngokujiyileyo labafana abazalolongwa ngumqeqetshi omutsha.

Iphephandaba likazulu lixhumane labacubunguli benguqu uqobo abathe iHighlanders yenze kahle ngokwesula uMudzingwa loMunawa.

Umhlonitshwa kwezokucubungulwa kwenguqu yakuleli uSakheleni Nxumalo uthe abalandeli bengasoli lutho.

“Umqeqetshi munye ngamunye  ulesizatho sokukhetha abadlali abathile atshiye abanye. UMadinda ulendlela yakhe aqeqetsha ngayo ngakho uyabazi abadlali abangenelisa ukuhambelana lebhola lakhe.UMadinda ngumqeqetshi okhwabitha ibhola elilomdladla, elidlalwa ngabafana abasakhulayo. Kodwa, uMudzingwa loMunawa labanye laba asebekhulile angeke benelise ukudlala ibhola elinjalo.

“Abadlali bakulezinsuku bayagijima, okuyikho obekusehlula uMudzingwa labanye. Umqeqetshi omutsha kanikezwe ithuba akhethe ithimu ayifunayo. Akumangalisi ukuphuma kukaMudzingwa loMunawa ngoba zikhona ingcitshi ezibalisa abangasekho emhlabeni uWillard Khumalo loMercedes Sibanda abaphuma ngalindlela. “Abalandeli abavume ukuthi bahloniphe wonke amanyethelo kaMadinda. Aluba uvumile ukuthi oMudzingwa bahlale eqenjini, kuzathiwani lapho iqembu selidliwa?” nguNxumalo lo.

UGodfrey Mabona Nkomo oyisazi kwezokuphathwa kwabadlali uthe kaboni lutho olubi olwenziwe yiBosso kodwa uxwayise uMudzingwa ukuthi aphange avuse inkophe.

“UMudzingwa ubesehlale kakhulu kuHighlanders. Ungabona umdlali eqeda iminyaka emihlanu eseqenjini elilodwa kuyasolisa kakhulu. Ukuhlala endaweni eyodwa ngokwakudala. Aluba wasuka esatshisa, ubezaphenduka. Inkuthazo yami ngeyokuthi uMudzingwa ahlakaniphe adinge iqembu ngokuphangisa.” kutsho uNkomo.

Kusenjalo uKnox Mutizwa owake wadlalela iBosso, ekhokhelwa nguMudzingwa okwamasizini ambalwa uthe ukhathazekile ngokususwa kukakaputeni wakhe.

“Uzahlala ungukaputeni wami. Ngifunde okunengi kuwe. Engikuzwayo ngokusuka kwakho kungizwise ubuhlungu. Kungasenani, impilo injalo. Qhubeka uyephambili mfowethu,” nguMutizwa lo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds