uMthunywa
YiNtatheli kaMthunywa
UKUDLALELA eHarare kungabe kuphazamise iqembu lamaChevrons nanko phela ukunqoba sekwehlule kumkhankaso wokungena kunkezo yomhlaba yekhilikithi.
Umqeqetshi wesizwe uHeath Streak utshaywa luvalo njalo engabe efuthelana ngenyathelo lokutshintshwa kwenkundla amaChevrons esuka eQueens esiya eHarare Cricket Club.
Umqeqetshi lo sewakhuluma kanengi ukuthi kungumbono wakhe ukuthi inkundla yeQueens ekoBulawayo iyavuma ukuthi abadlali bakhe batshaye loba bajike ibhola ngendlela eletha ukunqoba.
“Inkundla yeQueens ile-wicket elivumelana lendlela esidlala ngayo,” kutsho lumqeqetshi.
IZimbabwe idliwe yasala iqoqa okwayo yisizwe seWest Indies, okuyikhona okufake amaChevrons enkingeni ngoba kumele anqobe isizwe se-United Arab Emirates lamuhla nxa ezimisele ukuyafika eNgilandi kundebe yomhlaba.
Kulumdlalo, abafana besizwe bakhokhelwa nguGraeme Cremer kufanele befikise ama-runs angu-300 kusiya phezulu ukuze benelise ukuyibamba iUAE ingafiki inani eledlula i-200.
Kudingwa amaqembu amabili kuphela ukuthi ayehlangana lamanye eNgilandi.
Ingcitshi kwezekhilikithi uDean DuPlesis uthe angeke kube lula ukutshaya i-UAE ngoba layo ivule amehlo ifuna ukuya phambili.
“Inhlanhla iyadingeka kumaChevrons kodwa angeke ibuye mahala, kumele kusetshenzwe. Mhlawumbe nxa abafana bengafikisa i-300 kusiya phezulu, kungabalula.”
UStreak uphakathi kwetshe lembokodo lapho akhona ngoba ukwehluleka kwabafana bakhe kutsho ukuba laye uyehlulekile ukugcwalisa isithembiso sokufikisa isizwe eNgilandi.
Nxa enganqoba amaChevrons, kuzabe sekulula kuStreak ukuthi aqhubeke esemsebenzini.
Endleleni yokufika kubanga le-Super Six, amaChevrons adlule lula kuNepal nge-116 runs, laphinda umphehlo kusitha esidala iAfghanistan nge-2 runs.
Kumdlalo wawo le-Ireland, amaChevrons anqoba nge-116 runs, akhwela ngemiklomelo kulogu yamaqembu. Ukunqotshwa yiWest Indies kubuyisele isizwe emuva kulumkhankaso.
Kungumbono wenhlanganiso yeZimbabwe Cricket ukuthi uStreak angenise amaChevrons kumncintiswano wenkezo yomhlaba eka2019 engaphansi kwe-International Cricket Council.
