uMthunywa
YiNtatheli kaMthunywa
KAMBE kukhona okuseleyo kuBulawayo City?
Impendulo yalumbuzo izaphuma ngemva kokubukela omakhelwane iHighlanders leBulawayo City zingqikilana kumdlalo wesi-30 kuligi yeCastle Lager ngeSonto Emagumeni.
Impelaviki le izadibanisa njalo iChicken Inn le-Bulawayo Chiefs.
Ukudliwa kweBulawayo City kuzahle kuyithumele ezikwakweni zika-Division One ngokuphangisa lesizini ingakapheli. Ubuhlungu ngalokhu yikuthi ilakho ukuqethulwa ngumakhelwane wayo.
IBulawayo City isivalelisa ukudlala kuligi ephezulu kuthi iHighlanders ilwisa ukuthi iqede ikunombolo yesine.
Ukusadalala kweBulawayo City kunikeza umakhelwane wayo iBosso idlabuzane. Ngemiklomelo engu-19, kuzakuba nzima ukuthi Amakhosi asile kuligi le. Kuwo wonke amaqembu iBulawayo City yadliwa kanengi.
Iqembu lekhansili leli selanqontshwa kumidlalo engamatshumi amabili.
Iqembu leBulawayo City, eseliqeqetshwa nguBekithemba “Super” Ndlovu, lokhe langena kuPSL laxotsha abaqeqetshi abathathu ababalisa uMandla Mpofu, uDarlington Dodo loAmin Soma Phiri.
Kwalile ukuthi uNdlovu abengugqondongqondo ongayisiza ekamanisipala ukuthi ingasuswa kuPSL.
Isikhalazo esikhona ngaleliqembu yikuthi kuyini okwehlula ukuthi liphakame lona lilakho konke. Imali ayibuzwa kulithimu ngoba isekelwa yisikhwama sekhansili yakoBulawayo — imali yezakhamizi.
Umqeqetshi weHighlanders uMadinda Ndlovu ebuzwa ngenhloso yakhe kumidlalo eseleyo uthe enkambeni yakhe “kunzima” ngoba yena ufuna ukuqeda ekunombolo yesine.
“Kunzima. Kumele sidlale ngenhloso yokuqeda sikunombolo engcono, kutsho uMadinda Ndlovu ekhuluma kumsakazo weBossoTV.
Kweminye imidlalo, iFC Platinum ekhokhela ingalane ngemiklomelo engu-65 idlala leNichrut eAscot.
Izimbamgodi zizadinga ukwengeza imiklomelo yazo zibalekela iNgezi Platinum eseduzane ngemiklomelo engu-60.
INgezi Platinum yona inxuse iChapungu ngoMgqibelo. Impi yokuxotshwa kuligi layo ibiza abalandeli nanko iShabanie Mine idlala leHarare City.
Imidlalo yeCastle Lager kuviki lesi-30
-ZPC Kariba v Caps United (Nyamhunga)
-Ngezi Platinum v Chapungu (Baobab)
-Nichrut v FC Platinum (Ascot)
-Chicken Inn v Bulawayo Chiefs (Luveve)
NgeSonto:
-Highlanders v Bulawayo City (Barbourfields)
-Mutare City v Yadah (Vengere)
-Dynamos v Black Rhinos (Rufaro)
-Shabanie Mine v Harare City (Maglas)
