uMthunywa
NJENGOBA sesabelene okunengi ngegcikwane leHIV kuqakathekile ukwazi ukuthi ilizwe leZimbabwe lilabantu abangaba yi-1,3 miliyoni abaphila legcikwane leHIV.
Kuqakathekile ukuthi uqale i-anti retroviral treatment nxa uphila legcikwane leHIV. Ngemva kwenyanga eziyisithupha usehlelweni kumele uqalise ukuhlola isilinganiso segcikwane (viral load) emzimbeni wakho.
I-viral load kuyabe kutshiwo isilinganiso segcikwane egazini lakho. Lokhu kubonakala lula ngokuhlolwa igazi okutshengisa njalo ukuthi i-Anti-retroviral treatment isebenza njani ekuvikeleni amasotsha omzimba kweminye imikhuhlane.
Ukungakhanyi kwesisindo segcikwane emzimbeni kutsho ukuthi igcikwane leHIV emzimbeni wakho liphansi (kwe-40 copies/ml) okuyabe kusitsho ukuthi ngeke uthelele abanye abantu igcikwane.
Sungezwa njalo abezempilakahle bekhuluma ngokuncindezelwa kwegcikwane (viral suppression) (lapho igcikwane liyabe lingaphansi kwe-200 copies/ml) — nxa uke waba lokunye kwalokhu awukho engozini yokuthi uthelele abanye igcikwane.
Kwandise ukuthatha isikhathi ukuthi umzimba ujayele amaphilisi amatsha kumbe ukwelatshelwa kwegcikwane.
Lokhu kutsho ukuthi ukuba sehlelweni akutsho ukuthi ulesisindo segcikwane esingakhanyiyo njalo kuvame ukuthi isilinganiso segcikwane emzimbeni sitshintshe ikakhulu nxa usanda kuqalisa amaphilisi amatsha.
Sungabukeka njalo uzizwe uphile kuhle kodwa ukuzizwa uphilile kayisiso isibonelo esihle sokuthi isisindo segcikwane silungile.
Okungenza wazi ukuthi ulegcikwane elingakhanyiyo yikuhlala uhlolwa njalonje.
Kukhuthazwa ukuthi unathe amaphilisi okwenyanga ezingaba yisithupha ubusuhlolwa-ke isilinganiso segcikwane emzimbeni wakho ngababona ngezempilakahle okwenyanga ezimbili kusiya kwezine ukuze wazi ukuthi ulegcikwane elingakhanyiyo.
Kuqakathekile ukwazi ukuthi loba isisindo segcikwane singakhanyi, igcikwane leHIV lihlezi likhona emzimbeni.
Lokhu kutsho ukuthi ungekela ukunatha amaphilisi isilinganiso segcikwane siyakhuphuka okungaba yingozi empilweni yakho ende njalo kwenza uthelele abanye abantu igcikwane.
Wonke umuntu ophila legcikwane leHIV sengaba lesilinganiso segcikwane esingabonakaliyo na?
Akusibo bonke abaphila legcikwane leHIV abangaba lesilinganiso segcikwane esingakhanyiyo njalo kwandise ukuthi kwenziwa ngamandla omuntu.
Kwabanye abantu kungaba nzima ukuthola usizo oluvumelana labo kuthi kwezinye indawo ukuhlolwa kwe-viral load kungabe kungatholakali zikhathi zonke.
Nxa kuyiyo indaba le kuqakathekile ukuthi uqhubeke unatha amaphilisi njengokutshelwa kwakho ngabezempilakahle njalo uhlale ukhumbula insuku zakho zokubona udokotela. Ulakho ukuba lomzimba oqinileyo.
Nxa ungelaso isiqiniseko ngesisindo segcikwane emzimbeni wakho sekungaba lezinye indlela zokwehlisa ukuthelelwana kwegcikwane leHIV kwabanye ophilisana labo.
Laba ophilisana labo sebengafuna ukuthatha i-pre-exposure prophylaxis (PrEP) ukuze bahlale bengatholi igcikwane.
Ukusebenzisa amakhondomu kuvikela ukuthelelwana kwegcikwane kanye lezinye izifo ezithelelwana emacansini.
Nxa ungenelisi ukuthi isilinganiso segcikwane sihlolwe sikhathi sonke, kumele ungacabangeli ukuthi awulalo.
Nxa usenelisa ukuhlala ungabonakali phansi kosizo oluqondileyo kanye lokuhlolisiswa, okuhle yikuthi akumelanga uzikhathaze ngokuthelela labo ophilisana labo igcikwane.
Ukuba lesisindo segcikwane esingabonakaliyo kutsho ukuthi umzimba wakho usesimeni esihle njalo amasotsha omzimba asebenza kuhle ekuzivikeleni engcekezeni.
Ukuzinakekela kwakho kanye lokuhlolwa kuyisiqokoqela ekuhlaleni ulegcikwane elingabonakaliyo kodwa yindlela enhle njalo ekubeni lesiqiniseko sokuthi uhlale ulomzimba oqinileyo.
Nxa ungelalo igcikwane leHIV lowu ophila laye elegcikwane elingabonakaliyo ukusebenzisa amakhondomu yiyo yodwa indlela yokuzivikela kugcikwane, izifo ezithelelwana emacansini kanye lokuzithwala okungafunakaliyo.
Sungakhangelisisa njalo iPrEP njengenye indlela yokuzivikela kugcikwane leHIV.
Loba yisiphi isinqumo oyabe usithethe ngokuzivikela, kuqakathekile ukuhlala uhlolelwa igcikwane ukuze uhlale ungelalo.
