uMthunywa
Musa Janga
UMPHATHINTAMBO wogatsha olubona ngezempilakahle lokuphatheka kuhle kwabantwana uDokotela Obadiah Moyo usebike ukuthi kusiyafika umnyaka ka2030 ugatsha lwakhe lukhangelele ukuthi kube sokungasela-cholera kanye leminye imikhuhlane etholakala emanzini.
Ukhulume lokhu kumhlangano obekhona koBulawayo ngeviki ephelileyo oweWater Sanitation Hygeine and Energy (WASHen).
UDkt Moyo ubike ukuthi kuyinto eyangisayo ukuthi kubelelizwe elihlaselwa yimikhuhlane yesihudo ngenxa yengcekeza ngalesisikhathi.
“Kulihlazo ukuthi ilizwe lethu libe lilokhu lisahlaselwa yimkhuhlane yesihudo, akulunganga ukuthi abantu bafe ngenxa yalimikhuhlane kungakho sizazama ngakho konke okusemandleni ethu ukuthi umnyaka ka2030 usiyafika ilizwe libe selihlanzekile sekungasela mikhuhlane enjalo,” kuchaza uDkt Moyo.
Ubuye wathi ukuze bafinyelele kusithembiso sabo sika2030 kumele amakhansili akuleli asebenzelane labo ngokulungisa impompi ezithwala amanzi lezithwala ingcekeza ngoba ziyimbangela yemikhuhlane le.
“Impompi zamanzi lezengcekeza zafakwa eduzaneduzane ngakho nxa kungadubuka impompi yengcekeza idoti yonke ilakho ukufinyelela impompi zamanzi okunatha okungabeka impilo zabantu engozini.
Ngokwehlukanisa impompi lezi kuyabe sekulesiqiniseko sokuthi abantu banatha amanzi ahlanzekileyo,” nguDkt Moyo lo.
Uphethe ngokuxwaya abantu ukuthi bahlale benanzelela lumkhuhlane ngoba ungabe uthule kodwa awuphelanga.
