uMthunywa
YiNtatheli kaMthunywa
UMQEQETSHI wamaWarriors uSunday Chidzambwa uthe abadlali abakhethileyo ukuthi bayengqikilana le-Liberia kumaviki alandelayo ulethemba lokuthi bazaqedisa umkhankaso we-Afcon ngokunqoba.
AmaWarriors akhangelelwe ukuthi adlale le-Liberia mhlaka-14 Lwezi edolobheni leMonrovia kuhlandla lesibili lokungena ku-Afcon ka2019.
Kuhlandla lakuqala, iZimbabwe yanqoba 3-0.
UChidzambwa ukhethe abadlali abangamatshumi amabili lanye abazalwela indawo kuqembu elizavakatshela eMonrovia kumaviki amabili alandelayo.
Kulabo abadlali ubize osekhulile uWillard Katsande ogijimela iKaizer Chiefs. Umdlali lo uke wabika ukutshiya ukudlalela isizwe kodwa watshintsha ingqondo sekucaca ukuthi amaWarriors alakho ukuthi afinyelele ama-final omqhudelwano wamazwe lo.
Phakathi kwabadlali bakhe, uChidzambwa ukhethe ababili kuphela abadlala kumathimu akuleli.
Kumaqembu akuleli, umqeqetshi ukhethe unozinti weDynamos uSimbarashe Chinani loRodwell Chinyengetere owe-FC Platinum.
Iqula lamaWarriors lihlangene ligoqela ababalisa onozinti:
uGeorge Chigova (Polokwane City), uEdmore Sibanda (Witbank Spurs), Alec Mudimu (CEFN Druids), Ronald Pfumbidzai (Bloemfontein Celtic), Teenage Hadebe (Kaizer Chiefs), Kevin Moyo (FC Platinum), Byron Madzokere (Yadah Stars), Marshall Munetsi (Orlando Pirates).
Kubadlali abasesiswini:
kuloWillard Katsande (Kaizer Chiefs), Tafadzwa Kutinyu (Azam), Ovidy Karuru (Amazulu), Talent Chawapihwa (Baroka), Marvelous Nakamba (Club Brugge), Khama Billiat (Kaizer Chiefs) loKnowledge Musona (Anderlecht).
Abagadli okuthenjwe kubo ukuthi bahlohle, umqeqetshi ukhethe:
uEvans Rusike (SuperSport United), Knox Mutizwa (Lamontville Golden Arrows), Tinotenda Kadewere (Le Havre AC) loTerrence Dzvukamanja owe-Bidvest Wits.
Ngokuhlolisisa isimo sabadlali laba, kusobala ukuthi uChidzambwa usuthiseke yikudlala kakuhle abakwenzayo kumaqembu abo.
Ekhuluma ngabadlali bakhe, umqeqetshi uChidzambwa uthe asikho isidingo sokuba ayitshintshe ithimu yakhe kumidlalo ezayo.
“Laba yibo engibathemba ngeqiniso ukuthi bazasifikisa ku-Afcon. Babalelwa kuqula lenengi labadlali esilabo kuligi yethu laphetsheya abenza kuhle kakhulu. Ungalandela lapho abaphuma khona, abadlali laba badlala okuncomekayo.
“Asikho isidingo sokuyitshintsha ithimu le. Kwesinye isikhathi umqeqetshi kumele avume ukuthi abadlali bakhe bazimisele,” kutsho uChidzambwa ekhuluma loMthunywa ngoLwesibili.
Kusenjalo, amalunga enhlanganiso ezizibiza ngokuthi zisekela amaWarriors ngenhliziyo seziphose imlayezo yokuthi bafisela uChidzambwa leqembu inhlanhla kulumkhankaso.
Bekhuluma ngobunengi babo, abalandeli kuliviki bakhuthaze lenhlanganiso yeZimbabwe Football Association ukuthi ingaphambanisi amalungiselelo.
