uMthunywa
Arnold Ndlovu
KUKHULU okuzayo emcimbini osuwethiwe Made in Bulawayo walonyaka ozakuba khona mhlaka 11 Ncwabakazi.
UCal_Vin ongumhlabeleli wehip-hop onguye njalo owasungula umcimbi lo, uveze ukuthi umcimbi weMade in Bulawayo odibanisa abahlabeleli be-hip-hop bonke uzatshiya abantu befuna umphehlo.
Kubikwa umcimbi wanyakenye kawuzange ube muhle ngenxa yohlupho lwezinsimbi zomsindo okwakukhanya zingasebenzi kuhle okwenza abalandeli bomculo we-hip hop koNtuthu badana kakhulu.
Umhlabeleli lo uthembise okukhulu kumcimbi walonyaka ngoba engafuni impinda yalokho okwenzakala ngomnyaka odluleyo.
“Umcimbi womnyaka owadlulayo abantu babuya ukuzosisekela njengabahlabeleli be-hip-hop kodwa bacina bengasakholisanga ngoba umcimbi lo wawungahlelekanga ngendlela eyiyo kwabalezinto ezingazange zikhangelwe njengendaba ze-sound.
“Lonyaka umcimbi lo uzakuba khona mhlaka 11 Ncwabakazi njalo awusoze uqhutshwe endaweni lapho obuqhutshelwa khona eminyakeni emibili le edluleyo, lonyaka ngifisa ube sendaweni enkulu ngoba bebanengi abantu abafuna ukubuya emcimbini lo,” kutsho uCal_Vin.
Uqhubekele phambili wathi ukuze umcimbi lo uphumelele bakhona abantu azasebenzisana labo ngezindingeko zomcimbi lo.
“Lonyaka bakhona abantu engisebenzisana labo ngezindleko zomcimbi lo, eminyakeni emibili edluleyo indleko zonke zomcimbi lo zaziphuma esikhwameni sami kodwa njengomcimbi engiwenzela abahlabeleli bakoBulawayo ngikhethe ukuthi kube labaxhasi engizasebenzisana labo.
“Umcimbi lo i-Made in Bulawayo ngumcimbi ohlanganisa abahlabeleli bomculo we-hip-hop kanye labalandeli bomculo lo lokukhulisa umculo lo koNtuthu,” kuphetha uCal_Vin.
