uMthunywa
Ethel Ncube
Izakhamizi zakuWadi 21 eChipale eBinga zikhathazekile ngodubo lokuswelakala kwezibholane endaweni yabo osokubangele ukuba banathe ndawonye lenyamazana.
Izakhamizi lezi ezingaphansi kwenduna uSinamagonde esigabeni seChipale ziveze ukuthi udubo lwamanzi solubenqabele ukuthi bafeze iphupho labo lokuthuthuka ngoba sebenatha lapho ekugeza khona ingulube ngoba kungela ngitsho esisodwa isibholane lapho abangakha khona amanzi.
UMthunywa uxhumane loSamuel Ncube ohlala kule indawo yena obike ukuba amanzi abawanathayo kahlanzekanga njalo bayenelisa ukuhlaselwa yimikhuhlane bangaqhubeka bewanatha.
“Amanzi esiwanathayo angcolile njalo sinatha lapho okubhukutsha khona ingulube. Khathesi inkomo ziyahlupheka ngoba amanzi la lapho esiwagebha khona emigodini ayaphela izifuyo zicine sezinatha kanye kumbe kabili ngeviki ukwenzela ukuthi abantu bathole amanzi kuze kufike isikhathi sezulu,” kulandisa uMnu Ncube.
Iphephandaba likazulu libuye lakhulumisana lomlisa wakule indawo uJohannes Ndlovu yena obikele iphephandaba ukuba bacela uHulumende ukuthi angenele kuloludubo ngoba amanzi eyinsika yempilo.
“Amanzi aqakathekile kakhulu njalo nxa engekho lempilo asilayo. Lapha kithi amanzi asilawo sidinga uncedo kuHulumende kanye lakunhlanganiso ezizimele zodwa ukuba zisincedise ngokusigebhela izibholane ngoba amanzi phansi akhona okuswelakalayo yikuthi sigejelwe imigodi,” kulandisa umlisa Ndlovu.
Kubikwa lapho okukhiwa khona amanzi inkomo ziyangena phakathi zivoxe zidunge amanzi zifuna ukunatha.
Intatheli ikhulumisane losobhuku wakule indawo uSithembinkosi Ngonya yena ochaze ukuthi amanzi la kawahlanzekanga.
“Lapho esikha khona amanzi inkomo ziyachemela phakathi njalo sihamba umango omude ukuze siwathole.
“Sidinga uncedo lwezibholane ukuze lathi njengomama silime izivande sithole isitshebo, okwakhathesi kunzima ukuthi silime ngoba amanzi malutshwane njalo akhatshana,” kutsho uSobhuku uNgonya.
Kuvele ukuba ukuswelakala kwamanzi kubisela muva izinto ezinengi lapha eChipale nanko phela lenkomo seziswela ukuthi zizadibha ngaphi. UMthunywa ukhulumisane lesinye isakhamuzi uVelaphi Mgoba obike ukuba bayakhathazeka ukuba inkomo zabo zizacina zihlaselwa yimikhuhlane ngenxa yokuswelakala kwamanzi.
“Kunzima ukuthi inkomo zethu zidibhe viki zonke ngoba amanzi okuthi sigcwalise idibha malutshwana kungakho inkomo zethu zisengozini yokuhlala zilemikhaza ngoba zingadibhi,” kuphetha uMnu Mgoba.
