uMthunywa
Msilisi Dube
KULOMNTWANA wesigabeni sakoSikente, eTsholotsho olunywe yinja elobhova wayabhubhela esibhedlela seTsholotsho ngemva kwensuku ezinthathu.
Umntwana lo osengumuyi obeleminyaka yokuzalwa emihlanu kubikwa ubhubhe ngeSonto kuyonale iviki ngemva kokulunywa yinja yakomakhelwane ebihlaselwe ngumkhuhlane lo.
Omunye umfakazi okhulume loMthunywa uMnumzana Japhet Ncube uthe umuyi wathi eselunywe yinja le waba lezibonakaliso zomkhuhlane wobhova.
“Umuyi waqalisa ukukhwehlela njalo kwakungani yinja ekhonkothayo. emlonyeni lapha wayegxoza indenda.
Ugogo wakhe wamgijimisela esebhedlela seTsholotsho ukuba ayekwelatshwa.
“Umntwana lo wayedlala egumeni langakibo aze alunywa yinja le. Lanxa yayingatshengisi izibonakaliso zokuthi ilobhova ngakho abanikazi bacina beyibulala ngemva kokunanzelela ukuba yiyo eyabangela ukubhubha komntwana kamakhelwane wabo,” kuchaza uMnu Ncube.
Umfakazi lo ubuye waveza ukuba abantu bakulumango balomkhuba wokungahlabisi izinja zabo amajekiseni okuvikela umkhuhlane wobhova.
“Izakhamizi zivame ukufundiswa ngokuvikela umkhuhlane wobhova kodwa kabakuthandi ukuhlabisa izinja zabo.
Lokhu kuyingozi ngoba izinja zicina seziluma abantu,” kuchaza uMnu Ncube.
UNkosikazi Evelyne Chagwira ongu Animal Health Inspector eTsholotsho uthe uwutholile umbiko womntwana olunywe yinja wabhubha.
“NgoLwesihlanu sithole umbiko womntwana owalunywa yinja elomkhuhlane wobhova.
“Umuyi wathi eselunywe yinja leyo wagijinyiselwa esibhedlela seMadlamombe lapho isimo sakhe esafika saba sibi khona. Uthe esekhonale wadluliselwa esibhedlela seTsholotsho.
“Kukhanya umkhuhlane wamkhulela wacina esebhubha. Sathola ukuba inja leyo yayisilume abantu abane ngakho omunye wakhona waya eGoli engazange elatshwe,” kulandisa uNkkz Chagwira.
UNkkz Chagwira ubuye waveza ukuba inja le eyaluma umuyi yayisilesikhathi eside yacina ukuhlatshelwa umkhuhlane wobhova.
“Ekuchwayisiseni kwethu sathola ukuba inja le yacina ukuhlatshelwa umkhuhlane wobhova ngomnyaka ka-2013 ngakho eminye iminyaka le ibingasahlatshwa.
“Abantu ababili abalunywa yinja le bahamba esibhedlela bayahlatshwa ukuze bavikeleke emkhuhlaneni lo. Sithanda ukukhuthaza izakhamizi ukuba zihlabise izinja zazo ngesikhathi ukuze zivikeleke emkhuhlaneni lo oyingozi.
“Inja le yacina isibulewe ngoba yayisiyingozi ebantwini kunye lakwezinye inyamazana,” kuphetha uNkkz Chagwira.
