uMthunywa
YiNtatheli Mthunywa
KULANDELA ukuqhuma kwebhomu enkundleni yeWhite City koBulawayo ngoMgqibelo kubikwa sekulababili asebefile.
Ababili abedluleyo, uStanley Magunzva obhubhe izolo ebusuku lomunye okungasatholakalanga igama lakhe bebelaliswe esibhedlela seMpilo.
Ababili laba ngabanye babantu abangu-49 abalimala kumkhankaso webandla leZanu PF lapho okwaphoswa khona ibhomu ngenhloso yokubulala uMongameli welizwe uKhomuredi Emmerson Mnangagwa.
UClinical Director wesibhedlela seMpilo uDokotela Solwayo Ngwenya ubikele uMthunywa ukuthi omunye walaba ababili ubhubhe ngeSonto ebusuku kukanti omunye ubhubhe lamhlanje emini.
“Phakathi kwalabo akade belaliswe sekulababili esebedlule; oyedwa ubhubhe izolo ebusuku kukanti omunye ubhubhe lamuhla emini,” kuchaza uDkt Ngwenya.
Uqhubekele phambili wathi labo ababhubhileyo bebevele bekuyunithi yokunakekelwa okukhulu (Intensive Care Unit).
