uMthunywa
Nkosilathi Sibanda
ABANYE bazakuthi bephuma emabandleni ehlukeneyo balubhekise ezinkundleni!
Kuzakhala amavuvuzela kuzo zonke inkundla zebhola likanobhutshuzwayo kuliPhasika kulandwa imidlalo yesithathu yeligi.
Inhlanganiso yePSL ibika ukuba ikhethe ukugcwalisa imidlalo phakathi kwalelikhefu ihlose ukukholisisa uzulu othanda inguqu ngesikhathi esifitshane.
Isikhulumi sePSL uKudzai Bare uthe akulaqembu elizatshaya amangqetshane kusukela lamuhla kuze kuyephela ikhefu lePhasika ngoMvulo.
Lokhu kutsho ukuba imidlalo yesithathu leyesine izadlalwa phakathi kwamalanga amahlanu.
“Sinanzelele ukuba silekhefu elikhulu ngakho siphosele imidlalo yeligi emibili kulimpelaviki. Konke lokhu sikwenzele ukuba sikholisise umphakathi ngekhefu kanye lokuthi sisebenzise isikhathi esilaso,” kutsho uBare.
Ukukholiswa kwenguqu kuzabonakala eHarare ngoMvulo lapho iHighlanders ezangqikilana leDynamos eRufaro. Zombili zihlangana okwesibili kulumnyaka. Umdlalo wazo uzabe usesigodlweni.
Kusenjalo umqeqetshi weBosso ubeke umfana osakhulayo uNigel Makumbe phezulu njalo uncoma indlela adlala ngayo.
Umdlali lo othethwe kuqembu leFC Platinum kulisizini uqale kwezikaMagebhula elomfutho nanko wonke amabhola ahlohlwe yilithimu abephuma kuye.
Nxa engakhethwa kuqula elizahlasela iDeMbare, uMakumbe nguye ongabalusizo esitheni esidala.
Uhambo lwangoMvulo lukhangelelwe ukuthi lunxuse inengi labasekeli abasuka koBulawayo. Inhlanganiso yabasekeli eyeHeart and Soul izimisele ukuthi ikhiphe izimota ezizathwala abasekeli boqobo mhla welanga.
Ekhuluma lephephandaba likazulu ngoLwesibili uMgcinisihlalo weHighlanders uKenneth Mhlophe uthe ukhuthaza bonke abakhululekileyo ukuthi bangene umango.
“Iqembu ngelethu, asambeni siyolisekela ngenkani kuzo zonke inkundla. Nxa abafana bengabona usekelo abalutholayo, bazadlala ngokuzimisela banqobe,” kutsho uMhlophe.
