Uncategorized

Kudingwa obamba ogogo beMbembesi iganyavu

15 Nov, 2018 - 00:11 0 Views
Kudingwa obamba ogogo beMbembesi iganyavu

uMthunywa

Ethel Ncube
SEZIFISA ukuthi aluba kuhlala kusemini kaBha izalukazi zeSojini eMbembesi kepha sokulesigelekeqe esesidlisa abesifazana imbuya ngoluthi ngokuzinyenyela ebusuku azidlwengule, uMthunywa uyakuveza lokhu lamhlanje.
Isigelekeqe lesi ngobusuku bunye singenela izalukazi kanye lamanina angahlali labomkabo abathathu.
Kubikwa isigelekeqe lesi esilokhu singakabanjwa sesilenyanga siqalise ubunyamazana lobu.

UMthunywa uzwe ukuthi ngeviki ephelileyo isigelekeqe lesi singenele esinye isalukazi esileminyaka yokuzalwa efika phose ikhulu wasidlwengula okubangele ukuthi siqaleke njalo silimale leqolo.

UMnumzana Vanisha Nkomo oyisakhamuzi esigabeni seSojini uthe badidekile ngokuhlukuluzwa kwabesifazana esigabeni sabo.

“Siluzisi kakhulu ngobaba lo osesihluphela izalukazi ngokuzidlwengula. Umuntu lo kakabanjwa kodwa kukhanya ngumuntu ohlala esigabeni ngoba ungena emizini lapho okungelabobaba khona.

“Ngendlela enza ngayo kusegcekeni ukuthi kasuye muntu wakhatshana kukhanya ngoweduze. Omama asebehlukuluzwe ngumuntu lo banengi kakhulu esigabeni lesi ngakho sizama ukuthi sisebenzelane lamapholisa ukuze simlonde simbambe,” kulandisa uMnu Nkomo.

“Akwenzayo yisihluku esikhulu kambe kubogogo uyabe efunani. Emapholiseni udaba lolu salubika bathi singambona simbambe sibuye laye,” kubika uMnu Nkomo.

Esinye isakhamuzi uNkosazana Mercy Magadlela uveze ukuthi njengabesifazana sebesesaba ukuthi baphume phandle loba baye egangeni ukuyatheza. “Sikhathazekile kakhulu emoyeni ngondoda lo obamba iganyavu.

Sesihlalele evalweni ukuthi abantwana ungeke ubatshiye bodwa uyathola sebebanjiwe.

“Umsolwa lo ungene komunye umuzi wahlukuluza ugogo ovele sezikhulele. Wamdlwengula waze waqaleka uthe ugogo lo ephaphama engasakwanisi khona lokuvuka wakhasa ngamadolo waya komunye umuzi lapho afike walandisa khona wathola usizo.

“Ngempelaviki yonale isigelekeqe lesi sibonwe ngabantwana esezama ukungena ngakibo ethwele inkalakatha yebhemba kodwa uthe ebona ukuthi usebonakele wabaleka. Abantwana nxa bemchaza ukhanya ngowakhonapha esigabeni kungakho uzabanjwa masinyane nje,” kubika uNkszn Magadlela.

Uqhubekele phambili echaza ukuthi isigelekeqe le kungenzakal ukuthi silomuthi esiwusebenzisa osenza silangazelele omama ngale indlela.

“Omama labogogo asebeke bangenelwa yisigelekeqe lesi bathi nxa ezokungenela uyajunywa yibuthongo uphuphe angani kulomuntu ongena emnyango uzizwe uphela amandla. Nxa uphupha njalo uyabe engena endlini akuthole uvele ungasela mandla abe sebagubuzela ngengubo andubana abadlwengule,” kubika uNkszn Magadlela.

Intatheli ikhulumisane lenduna uDumisani Ndondo oveze ukuba ulusizi ngokwenzala endaweni yakhe.

“Umuntu lo ngabona uyagula ingqondo akulamuntu ongabamba ogogo asebezikhulele. Ngilamalanga amabili ngihamba emapholiseni ukuthi kudingwe umuntu wakhona. Kulamapholisa esigaba aphumileyo lawo ukuyadingisisa. Ngicela umphakathi usebenze ndawonye lamapholisa ekuphenyeni udaba lolu,” kutsho induna uNdondo.

Uqhubekele phambili esithi ukhathazekile ngoba lezinsuku imikhuhlane ethelelwana emacansini minengi kungakho kungenzakala ukuthi isigangi lesi kasizivikeli emikhuhlaneni.

“Ngikhathazekile kakhulu ngoba lumuntu kungenzakala ukuthi ijazi lomkhwenyana kalisebenzi njengoba evele ejonge ukuphambanisa impilo zabantu,” kutsho induna uNdondo.

Iphephandaba likazulu lixhumane loChief Inspector Siphiwe Makonese oyisikhulumi samapholisa esabelweni seMatabeleland North oveze ukuthi udaba olunjalo basaluchwayisisa njengamapholisa.

“Udaba lokudlwengulwa kwabesifazana lwafika endlebeni zethu kodwa kulabesifazana ababili nje kuphela ababikela amapholisa ngokubanjwa iganyavu ngumuntu owabangenela ebusuku.

“Amapholisa enza imizamo yonke ukuthi umuntu lo abanjwe njalo sicela labo abangabe belolwazi lokuthi ngubani bancedisane lamapholisa,” kubika uChief Insp Makonese.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds