uMthunywa
Nkosilathi Sibanda
UDONALD Ndebele onguMgcinisikhwama weqembu leHighlanders usencedise abadlali be-boxing ngokubaqoqela umncintiswano omkhulu ozahlanganisa izabelo zonke elokitshini leSizinda ngoMgqibelo.
UNdebele, ongusomabhizimusi ongumaqhuzu ebhawa yase-Sizinda South usekele umncintiswano wabajiki benqindi lo ozaqhutshelwa endaweni yakhe le.
Ibhawa kaNdebele ikhethwe ukuthi iqhube imidlalo le kulandela ukunanzelela kweZimbabwe Boxing Federation ukuthi lindawo ibiza abantu abanengi.
Umbiko owethulelwe iphephandaba likazulu yinhlanganiso yeZimbabwe Boxing Federation ibika ukuba imidlalo yangoMgqibelo izasetshenziswa ukukhetha abadlali abazabumba iqembu elizamela isizwe.
Phakathi kwabadlali abazakholisisa uzulu babalisa uFuture “Nurse” Maziya owe-Hwange osemofuze izihlathi zamadoda amanengi. Umdlali lo nguye intshantshu yama-Zimbabwe National Youth Games ka-2017 kuhlandla labasacathula emdlalweni.
Abadlali bamakilabhu alolonga koBulawayo abalisa iSizinda, iLobengula leTshaka bakhangelelwe ukuthi babe banengi.
Ekhuluma loMthunywa kuliviki umqondisi wenhlelo zeZimbabwe Boxing Federation uSteven Masiyambumbi ubike ukuba kuzaphatheka izabelo zonke zelizwe kanye lequla le-Zimbabwe National Army. Kuzancintiswa kumahlandla abalisa abasakhulayo, lalabo abaleminyaka engu-40 kusiya phezulu.
Uthe loba bengelalo usekelo olweneleyo, uNdebele nguye yedwa ohamba phambili ngokuncedisa ngemali kumdlalo we-boxing.
“Sikhangelele ukuthi samukele abadlali abangu-200. Imidlalo yonke izasetshenziswa ukukhetha iqula elizadlalela iZimbabwe kumncintiswano weWorld Championships kwele-India ngenyanga kaMpalakazi.
“Sithanda ukubonga umnikazi weSizinda South Beer Garden uDonald Ndebele ngokusisekela ngakho konke ukuze umdlalo we-boxing ukhule koBulawayo. Kungayisuye uNdebele, aluba sehluleka ukuqhuba imidlalo,” kutsho isiphathamandla lesi.
