uMthunywa
Gladmore Ncube
IZIKOLO ezingu-16 ziyadibana eGifford High ama-Under-20 mhlaka 15 lo16 Nhlangula ku-tournament ye Organisation of Rural Associations for Progress (Orap) Zenzele Isuzu Tournament.
Imidlalo le ezabiphethwe koBulawayo eGifford izagoqela ama-Under-20 abafana kanye lamantombazana abavela ezikolo ezivela ezabelweni zeMatebeleland North, Matebeleland South lezivela khonapha koBulawayo ngaphandle kweMidlands yiyo kuphela engakabisi amabizo amaqembu ayo.
UNqabayezwe Nkiwane osebenzela i-ORAP uthe imidlalo yalonyaka ulethemba lokuthi izabe imnandi kakhulu njalo kulokuncintisana okuthize ngoba isabelo seMidlands sesibisile inani lezikolo ezizabe zidlalo kule imidlalo.
“Sikhangelele ukuthi imidlalo yalonyaka ibemnandi kakhulu ukwedlula iminyaka eyedluleyo ngoba izabelo sezithumele inani lamaqembu azabe ebhaqabulalana emidlalweni le.
“Ngalokhu silethemba lokuthi kuzabe kulomnintiswano omkhulu emdlalweni le. Amaqembu azabe ekhona lapha azaphiwa amabhola lama- kits okudlala,”kuveza uNkiwane.
Uqhubekele phambili wathi iGifford High School ezabe imele iBulawayo izadlalelwa ngama-Under 20 abafana sekusithi iMatebelend South izabe ile-Manama le Malungudzi High School emaqenjini amankazana.
Sekusithi i-Manama leTongwe High School zizadlala eqenjini labafana njalo.
ESabelweni seMatebeleland North eqenjini labafana kuzabe kule Tsholotsho, Mabikwa le Gloag High School sekusithi emankazaneni kuzabe kule Pashu High School.
“Isabelo se-Midlands sithe sizathumeza ezinye izikolo ezimbili ezizadlala emidlalweni le,”kuphetha uNkiwane.
