uMthunywa
YiNtatheli kaMthunywa
OWATHI inyama yabobabhemi idliwa eBotswana kuphela wayengazi nanko phela sekuvele ukuba kulezakhamizi zeGwanda esiqintini seMathengwane ezilwe zaze zadabulelana amabhulugwe zibanga inyama le. Kubikwa eGwanda ubabhemi uqale ukudliwa ngomnyaka ka-2013 njalo kucatshangelwa ukuthi lokhu kubangelwa yindlala njengoba izulu lingani kuhle kuleyondawo, uMthunywa ukuzwile lokhu.
Kufike endlebeni zentatheli ukuthi kulezakhamizi zeMathengwane ezilitshumi ezibhaxabulane kwaba Luthuli kumaviki amabili edluleyo, kubangwa inyama kababhemi owacatshayo wasetholakala ehlinzwa ngamanye amadoda amabili.
Ukulwa kwezakhamizi lezi yikho okuveze ukuthi ngempela obabhemi sebedliwa eGwanda.
Umfakazi oqotho kuloludaba uSobhuku uMnumzana Sakhelene Moyo uthe wazibonela ngawakhe amehlo ukuthi ezinye izakhamizi seziphephela ekudleni obabhemi.
USobhuku lo ubikele iphephandaba likazulu ukuthi izakhamizi zakuleyo ndawo zafika zabhuza phezulu kukababhemi owayehlinzwa.
“Kwaqunywa inyama eyinye bayabelana bathwala bayalayo emzini yabo.
“Lami ngamangala ngibona izakhamizi sezithwala amantshontsho enyama kababhemi kukanti kudala abantu babengayikhangeli inyama le. Mina ngangisithi bazayitshisa inyama le kodwa abakwenzanga lokhu,” kutsho usobhuku uMnu Moyo.
Kuzwakale njalo ukuba sokuyinjwayelo ukudliwa kwenyama kababhemi lakwezinye indawo zeGwanda.
UMnumzana Khumbulani Tshuma uthe eMawaza baqale ukudla inyama le nyakenye.
“Mina ngiqalise ukuzwa ngokudliwa kwenyama kababhemi eMawaza ngomnyaka ka-2014. Laba ke bona baseduze lomngcele weBotswana okungabe kuyikho okubenza bayidle njengoba bayake babone eminye imihlobo yabantu izidlela inyama le, cala celeni,” kutsho uMnu Tshuma ozalwa eMawaza.
Omunye ukhansila wakuleso sigaba othande okuziveza ngokuthi nguMpofu nje kuphela, ubike ukuba inyama kababhemi imnandi.
“Inyama ivele yinyama. Angithi kayibulali ngakho-ke kangiboni cala kulokhu,” kutsho uMpofu.
