uMthunywa
Nkosilathi Sibanda
IKUSASA lomdlali webhola lenyawo uSimon “Yola” Munawa selicaca nanko phela usethole ikhaya elitsha kuChicken Inn.
Kumalanga ambalwa adluleyo bekungacaci ukuthi lumdlali uzenelisa ukudlalela enkundleni zeligi enkulu.
IChicken Inn ibiqale yafihla ukuba iyamfuna umdlali lo isithi izamupha ithuba elilodwa lokuthi azitshengisele kuqembu.
Kubikwa umqeqetshi uJoey Antipas uyawuvuma umdlalo kaMunawa kodwa usafuna ukuthi ambone mhla iChicken Inn izadibana leqembu leZanaco eleZambia ngoLwesihlanu.
Okwamanje, iphephandaba likazulu lizwe ukuba uMunawa useyiphiwe incwadi yokudlalela iChicken Inn.
Umfakazi oqotho oseduzane oncwebe uMthunywa ngaloludaba uthe umdlali usezaligqoka ijesi lamaGamecocks.
“UMunawa useyingenile iChicken Inn. Kulindwe ukuthi kuvezwe emphakathini ukuthi usengumdlali weqembu,” kutsho umfakazi ohlezi phezulu kuthimu yeChicken Inn.
Isikhulumi seChicken Inn uTavengwa Hara siphume kumaphephandaba kuliviki siveza ukuba abaqeqetshi basakhangelisisa ukudlala kukaMunawa.
Abacuphi babadlali bazise leliphephandaba ukuba iChicken Inn yayimfuna kudala uMunawa.
Okungabe kuhuge ukuthi iqembu lisayine lumdlali kungabe kuyikuthi belifuna umdlali osekhulile ololwazi olujulileyo ngebhola lakuleli.
Umdlali lo ukhafulwe yiHighlanders kulisizini ngoba umdlalo wakhe labanye abakhafuliweyo ungakhwabithisi umqeqetshi omutsha uMadinda Ndlovu.
UNdlovu wabika ukuba ufuna ukusebenza labafana abasakhulayo hatshi ezadla ubhedu. UMunawa uleminyaka yokuzalwa engu-30.
