uMthunywa
ABADALA beHighlanders bazathi ukwehlisa umoya badlale iKhisimusi bekhululekile nanko phela abadlali abahlanu sebethe abasoze bayifulathela ekaMatshobane.
Lokhu kuza ngemva kokuba iHighlanders ibisitshaywa likhanda inakana ukuthi abadlali bonke bazalandela ingqondo zikaPeter Muduhwa loGabriel Nyoni okubikwa sebehugwa yimali kwamanye amaqembu.
Kubadlali asebekhethe ukungena iKhisimusi besayine isivumelwano sokudlala kuloMbongeni Ndlovu, Vincent Moyo, Charlton Siamalonga, Brian Jaravaza loGodfrey “Baba Jukwa” Makaruse.
UMakaruse ubebalelwa kulabo abazasuka eqenjini kodwa kubikwa utshintshe ingqondo ebusuku, wavuka ecabange ijesi lamawaba.
Iqula eliphethe ngezokuphuma kwembiko kuleliqembu alizange liphuze ukubika ukungena kwabadlali laba.
“Sikubika ngokugcweleyo ukuba uMbongeni Ndlovu, Vincent Moyo, Charlton Siamalonga, Brian Jaravaza loGodfrey Makaruse sebevumile ukuba lesivumelwano esitsha sokwengenza ukudlala kwabo kuHighlanders. Sibatshayela izandla,” yiBosso le kumbiko ewuthumele abalandeli ngoLwesithathu ekuseni.
Omunye wabadlali bodumo kuBosso unozinti uAriel Sibanda waba ngowokuqala ukuvuma ukuthi aqhubeke leqembu.
Kusenjalo, umgcinisihlalo weqembu uKenneth Mhlophe uthe angeke benqabele abadlali nxa befuna ukusuka eqenjini.
“I-Highlanders yithimu yezwe lonke. Nxa umdlali efuna ukusuka, angeke simvalele kodwa simnikeza ithuba lokuthi aqhubeke ngempilo.”
Iphephandaba likazulu likuphethe ngokugcweleyo ukuthi uGabriel Nyoni ukhangelele ukuya kuCaps United lapho asethenjiswe khona inqwaba yemali, umsebenzi lendlu.
Lumdlali kubikwa ufunwa ngelibomvu yiNgezi Platinum futhi.
Agcwele phamu amahemuhemu ebulenjini lasembikweni ethunyezwa kuMthuywa ukuthi uMuduhwa kuseduzane ukuthi iChicken Inn imnike umsebenzi.
Kulindwe ukuthi kucace ukuthi inkulumo lezi zimi njani nanko phela leHighlanders iyavilapha ukukhulumisana labadlali bobabili uMpalakazi engakapheli.
Ekhuluma lentatheli kaMthunywa uMuduhwa uthe uzazi esagqoke ijesi leTshilamoya.
