uMthunywa
Singakhuluma sithini, iqiniso yikuthi abawafuni ama-illegal immigrants eGoli!
Uzwa bethi ngamaKwerekwere, amaZizimbane, amaBhunguka, aboKufika kumbe intwala betsho phela abaseGoli ngokungekho emthethweni.
Zikhulumile izikhulumi ezihloniphekayo ngitsho sibi sikaMongameli weSouth Africa, ezama ukupholisa amaseko ngokuchitheka kwegazi okusuke kwenzakala kuzizalwane zakwamanye amazwe.
Ye, angabe kade ekhuluma elesihelo kodwa ngaphakathi kwakhe ethi kabahambe.
Yikho eze wathi abafuna ukuhamba bangahamba bazabuya kutsha sekulungiswe incwadi zokuthi bahlale eMzansi ngokusemthethweni.
Phela abadala bathi ungezwa icalaha likubhongela phenduka ngoba ungabe lokho usiya kulo licina likulumile. Kade zakhonona inzula ngabavela kwamanye amazwe, sakutshaya indiva.
Ungangizwa kabi, engikucelayo kuzizalwane zonke zakuleli yikuthi nxa uzavakatshela kwelinye ilizwe bona ukuthi ulungise incwadi zakho waba ngumuntu ovumelekileyo njalo ozakwamukeleka.
Singakhohlwa ukuthi kukhona okungavela kodwa nxa ulezincwadi kulula ukuthi sikulandelele.
Into edukuda umoya wami yikuthi uHulumende wethu uwakhiphile amabhasi okuthwala abantu abahlaselweyo, kodwa inengi labo lalile ukuphindela ekhaya.
Kungcono uze ekhaya ngoba nango loHulumende wethu unika abafuna umhlabathi, uziqalele elakho ibhizimusi, kulokuthi ubelokho uhlukuluzwa ngabantu ezweni labo sekungani wena awulalo elakho ilizwe.
Okunye njalo okwenza ngithi abasifuni ezweni labo yikuthi amapholisa akhona abethi nxa abantu behlaselwa ubone begoqe izandla abanye bezihlekela nje kumbe yikuthi ngibaqathanisa labekhaya abahle bakweqele nxa utshaya omunye.
Phela sikhumbule ukuthi eminyakeni embalwa edluleyo bake babulala abantu bethi babathathela imisebenzi lokunye okutshiyeneyo.
Asikhumbuleni ukuthi kwelakithi ungaxabana lezivakatshi abomthetho bahle bakunqande ngitsho lomphakathi uhle ukwegweme.
Zinengi izizatho ezenza abantu baye eMzansi kodwa nxa sekunje abantu sebelahlekelwa yimiphefumulo asimeni kancane ukuya khona.
Sizafika isikhathi lapho abazabona khona ukuthi umakhelwane uqakathekile. Ngiyazi kubuhlungu silahlekelwe ngabafowethu kodwa izizalwane zaseGoli ezilapha kwele-Zimbabwe singazihlukuluzi siziphathe ngekhono ukwenzela ukuthi labo bayefakaza ngathi nxa sebethe baphindela kubo.
Phela ngesiLungu bathi “Eye for an eye makes the world blind”. Asibatshengiseni uthando sibamukele ngesihle.
Umoya wokuphindisela asingabi lawo, siwulahlele le, elwandle udliwe zingwenya, kumbe siwujikele eKhalivari.
Isicelo sami kumadoda asibusayo yikuthi kabadingisise, ukuthi kungani abantu bedlulubundela belubhekisa eGoli lapho abangafunwa khona, zamani ngamadla ngoba bazaphela abafowethu sikhangele njalo libaxwaye ukuthi babelezincwadi nxa bezaphuma kuleli.
Ayixabene; Mehleli Dube 0772673682
