uMthunywa
MAVIKI onke elikazulu likhetha ukukujabulisa wena mlandeli walo ngokukulethela abantu abatshiyeneyo bechazela uzulu ngamathalenta abo atshiyeneyo. Kule iviki uMthunywa ukudibanisa letshatshazi lakoNtuthu elilephimbo elimnandi okwamagama kuvume ontanga kuthi amajaha atshaya amavosho. Le yintombi eyaziwa ngelithi Sammy Eland ephuma khonapha komfazi utshay’ indoda yena engumhlabeli, umahlekisa kanye lomlingisi.
Balandeli bakaMthunywa, nxa lifuna ukwazi kabanzi ngomhlabeleli lo nansi ingxoxo phakathi kwentatheli yephephandaba uArnold Ndlovu (AN) lomculi uSamantha Mpofu (SM).
AN: MaMpofu akusithi fahlafahla ngamafitshane ngembali yakho kanye leyomculo lokuthi wagqugquzelwa yini uze ukhethe ukucula iGqom.
SM: Mina ngokuzalwa ngethiwa ibizo elithi Samantha Mpofu kodwa emculweni ngisebenzisa elithi Sammy Eland, ngiyintombi eleminyaka engu-25 yokuzalwa, ngingumculi, umahlekisa kanye lomlingisi. Ukucula okokuqala yisiphiwo kimi ngoba ngikhule ngithanda ukucula ngaze ngaba lilunga labahlabeleli bebandla engikhulele kulo.
Ngikhula ukubona abahlabeleli abafana loMsawawa, Mzambia bejabulisa abantu kwangifaka intshukuntshu yokuthi ngelinye ilanga lami ngifuna ukujabulisa uzulu. Okungenze ngakhetha umculo weGqom ngabahlabeleli abafana loBusiswa leDistruction Boyz ngoba ngumculo wentsha.
AN: Hawu, ukucula njengoba waqala esontweni ukungena estudiyo usuhlabela ngezinga eliphezulu khona ukuqale nini?
SM: Ukuqalisa ukuhlanganisa ingoma ngise-studiyo ngikuqale ngomnyaka ka2015, njalo sengisebenze labantu abatshiyeneyo abaseZimbabwe, South Africa kanye leNamibia.
AN: Lokhu waqalisa ukucula sowakhipha amadlalade amangaki njalo ujwayele ukuthokozisa abantu ungaphi?
SM: Bengingakakhiphi idlalade ngoba ngisalipheka ukwenzela ukuthi ngethulele abalandeli bami umsebenzi osezingeni eliphezulu, okwakhathesi sengakhipha ama-singles ambalwa njalo elitsha liyeza maduze nje.
Mina njengomculi ohlala koNtuthu yiyo indawo engivame ukuculela khona, ezikhathini ezinengi ngicula kuma-concerts, imibuthano efundisa intsha lasemicimbini eyehlukeneyo ebakhona koNtuthu.
AN: Abantu bawamukela njani umculo wakho njalo ukhangeleleni emculweni wakho?
SM: Abantu bayawuthanda umculo wami ikakhulu intanga zami sezingibiza ngokuthi ngiyiGqom Queen yabo.
Inkuthazo ngiyayithola lasebantwini abadala ukuthi ngiqhubekele phambili ngisenza umculo wami.
Engingakuthembisa abantu abangisekelayo yikuthi ngizasebenza nzima lonyaka ngize ngibakhiphele idlalade elizabathokozisa zikhathi zonke.
AN: Bunzima bani oyake uhlangane labo kwezomculo njalo nkuthazo bani oyipha abaculi abasasungula?
SM: Ubunzima engiyake ngihlangane labo yindaba zokubhadalwa ngoba kwezinye izikhathi ucina uhlabelela ukwaziwa kuphela lokwethulela uzulu umculo wakho. Okunye engiyake ngihlangane lakho yindaba yokuthi njengomuntu oyintombazana ukungena endimeni le ebanjwe kakhulu ngabesilisa kunzima kodwa ngokuzinikela ngizaqhubekela phambili ngomculo.
AN: Ukuvulwa kwemisakazo koBulawayo kube lomehluko onjani empilweni yakho njengomhlabeleli?
SM: Mina ngiyajabula ngokuvulwa kwemisakazo le ngoba khathesi imiculo sithola indawo lapho etshaywa khona kungakho akusafani lakuqala ngoba sasisenza umculo ngokuwuthanda kuphela kodwa khathesi ususincedisa.
