uMthunywa
YiNtatheli kaMthunywa
KULABOMAKOROKOZA ababili abavela eFilabusi abafileyo ngeviki ephelileyo emgodini weVova Mine eGwanda kubangwa i-detector, uMthunywa ukuzwile lokhu.
Isiga lesi senzakale ngoLwesibili kuviki esanda kwedlula lapho omakorokoza laba abavezwe ngokuthi nguCaleb Phiri loKelvin Sibanda akade besilwa lelinye iqembu lezimbamgodi kubangwa umtshina wokudinga igolide.
Ekhuluma lephephandaba likazulu uMnumzana Steven Phiri umfowabo kaCaleb uthe kubuhlungu ukulahlekelwa yisihlobo ngenxa yomtshina nje.
“Besingakukhangelelanga ukuthi umfana obesakhula afe ngendlela enje, ufe esilwa labangane bakhe. Okubuhlungu yikuthi akulamuntu okhulumayo ukuthi ngubani ombuleleyo,” kuchaza uMnu Phiri.
Omunye umfakazi uMnumzana Mbekezeli Khanye uveze ukuba umgodi lapho okwafela khona amadoda la wavalwa nguHulumende ngomnyaka ophelileyo ngakho omakorokoza laba bebegebha okungekho emthethweni.
“Umgodi lapho okwafela amadoda la wavalwa nguHulumende ngoba usuyingozi ngakho abantu batshelwa ukuba bengagebhi kuwo. Omakorokoza laba bahamba ebusuku besiyagebha ngakho bonke bafuna ukusebenza ebusuku ngoba kuyabe kungela mapholisa angababopha.
“Ngelanga amaqembu la exabana, uCaleb labangane bakhe babesala ukuthi elinye iqembu lihambe lomtshina ebusuku, kukanti bonke bayesaba ukusebenza emini,” kuchasisa uMnu Khanye.
Isikhulumi samapholisa esabelweni seMatabeleland South uInspector Philisani Ndebele uthe umbiko wabomakorokoza ababili abafe bebanga umtshina wokudinga igolide belungakafiki kibo waphinda waxwayisa omakorokoza ukuthi baqakathekise impilo.
“Umbiko lo ubungakafiki endlebeni zethu kodwa sizadingisisa kabanzi ngawo. Njengamapholisa sixwayisa omakorokoza ukuthi beqaphele baphinde balondoloze impilo zabo,” kuphetha uInsp Ndebele.
