Izasondela ekasi i-Basketball

11 Jan, 2018 - 00:01 0 Views
Izasondela ekasi i-Basketball UJoe Mujuru

uMthunywa

YiNtatheli kaMthunywa
LONYAKA abadlali abalethalenta ku-basketball bazathola usekelo nanko inhlanganiso yeBulawayo Basketball Association ibika ukuba izaqoqa imidlalo yeligi yayo kunkundla ezithile emalokitshini.

Lesi yisiqalo kulumdlalo owaziwa ngokudlalelwa enzikini yedolobho lakoBulawayo. Kumbali yeBBA akukaze kudlalelwe enkundleni ezisemalokitshini.

Inkundla ebisetshenziswa ngeye-Khanyisile edume ngokuthi yiBulawayo Centre for the Disabled (BCD).

KoBulawayo zigcwele inkundla ze-basketball ikakhulu ezikolo lakundawo zekhansili lapho okuhlangana khona intsha izikholisisa.

UJoe Mujuru osengumongameli weBasketball Union of Zimbabwe (BUZ)  uthe kungumbono wabo ukuthi kumele kulisizini bakhuthalele ukususa imidlalo emadolobheni bayise lasemalokitshini.

UMujuru, ohlala koBulawayo, ubengumongameli walinhlanganiso mhlaka 16 kuMpalakazi ngomnyaka odluleyo.

Uzakhokhela okweminyaka emine elandelayo.

Ngaphansi kohlelo lwakhe, uMujuru wathembisa ukuqhelisa umdlalo lo.

“Umdlalo wethu uzafinyelela ebantwini, emalokitshini ngenxa yokuthi yikho okulosekelo lwethu. Injongo ngeyokuthi sikhuthaze abantu bakithi ukuthi bephatheka kulumdlalo,” kutsho uMujuru.

Isiphathamandla lesi sake sabangunobhala jikelele we-BUZ njalo sibalelwa kulabo abaphakamisa umdlalo we-basketball koBulawayo.

Kusenjalo, amaqembu akuligi ephakemeyo ngaphansi kweBUZ aselungiselela ukuvulwa kwemidlalo ka-2018.

Ezinye iziphathamandla ezivotelweyo zibalisa uCharmaine Chamboko ongunobhala, uSikhumbuzo Ndlovu (osekela umongameli), Opportunity Moyo, Ignatius Yesaya, loTaurisai Chitsinde.

Kukhangelelwe ukuthi kumaviki amabili alandelayo amaqembu adlalela kuBulawayo Basketball Association  aqoqe umqhudelwano wokuhlangabeza isizini entsha.

Longumqhudelwano owandise ukudibanisa amathimu amadoda labomama. Amaqembu aphuma kwamanye amadolobho ayanxuswa.

Uhlupho olubhekane lamaqembu amanengi nxa kuqala umnyaka yikuswelakala kwemali yokudlala i-affiliation fee.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds