IZA NGOMFUTHO IHWANGE

03 Jan, 2019 - 00:01 0 Views
IZA NGOMFUTHO IHWANGE UNation Dube

uMthunywa

YiNtatheli kaMthunywa

IQEMBU leHwange alizange lizinike ithuba lokuphumula kukhefu elisanda kwedlula nanko phela umqeqetshi walo, uNation Dube uthe ufuna ukuqala isizini yalonyaka esazi ukuthi abadlali bakhe baqinile.

UDube uphendukise iHwange emsindweni womqhudelwano webhola lenyawo kuligi yeCastle Lager ngemva kokuhlala umnyaka isezikwakweni zika-Division One.

Umqeqetshi osethole udumo lenhlonipho ngokusiza leliqembu wabangumqeqetshi oyedlule bonke waphiwa isicoco esivela kunkampani yeLiquor Hub. Ubikele  iphephandaba likazulu ukuba unikeze abadlali bakhe ikhefu elincinyane ngoba ehlose ukuthi bagijime okuzwayo imidlalo ingakaqalisi.

Imidlalo yePSL ikhangelelwe ukuqalisa ngoMbimbitho.

“Ikhefu lethu lizancipha ngoba angifuni ukuthi abadlali bekholise kakhulu bekhohlwe ukuthi sesiphendukile kunkundla zePSL.”

Uthe njengoba bengachinsi ukudlala kuPSL, inhloso yakhe inye kuphela — ukudlalela ukunqoba yonke imidlalo.

“Angeke phela singene emncintiswaneni singelayo intshukuntshu yokuwina. Inhloso yami yikubamba indawo yethu kuPSL, ukuze sikwenelise lokhu kumele sinqobe yonke imidlalo. Ngizabatshela abadlali ukuthi lokho yikho esizaqina ngakho,” kutsho uDube.

Lumqeqetshi uqede isizini ka-Division One engazange anqotshwe. Ukubika ngokungesabi  ukuthi uzayilwela  inkezo yeCastle Lager.

“Iphutha elingaphindwayo yilelo elokudliwa sibuyiselwe phansi. Abadlali bayazi ukuthi ukuwa kwethimu yikuwa kwamabizo abo. Ku-Division One akubuyelwa. Sizakulwa njengamanye amaqembu ukusondelela inkezo.”

UDube ubike njalo ukuba akasoke athenge umdlali ngoba uyasuthiseka ngabadlali abakhona. Uthe mhlawumbe engasuthisa iqembu ngokunxusa abadlali abasacathula.

Imbali yeHwange iyakuveza ukuba leliqembu alikaze lithenge abadlali abavela kwezinye indawo.

“Isinqumo esikhona esivela kubasekeli lenkokheli zethimu yikuthi iChipangano idlalelwe ngabafana abaphuma eHwange kuphela. Akula mdlali engimfunayo ngaphandle kwalabo engilabo khathesi,” kutsho umqeqetshi lo.

Esinye isizatho sokuthi iHwange ingazihluphi ngokuthenga abadlali yikuthi iqembu aliselamali ngoba inkampani elisekelayo iHwange Colliery isebunzimeni.

UDube ucele usekelo lwabalandeli babo wathi sekumele balandele ithimu kumidlalo yabo yonke.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds