uMthunywa
INTSHA yakoBulawayo isithathele phezulu imncintiswano yemidlalo yebhola lenyawo lelokuqaga ehlose ukulwisa ukumemetheka kwengculazi emalokitshini.
Imidlalo le, engaphansi kweligi yeHIV Prevention League esilamaviki amane isunguliwe, isihuge inengi labasakhulayo abalethalenta asebebumbe amaqembu atshibilika nsukuzonke enkundleni ezitshiyeneyo koNtuthu.
Imidlalo le iqhutshwa yinhlanganiso yeYouth Creative Ideas isekelwa kabanzi yiNational Aids Council.
Ngempelaviki edluleyo adibene amaqembu kumdlalo kanobutshuzwayo lapho okuhlohlwe amabhola amanengi ngeviki elilodwa.
Iqembu leZwakala Zulu libhaxabulwe yiMakhandeni Pirates nge4-1 kumdlalo wakuqala. Angene atheleka njalo amabhola kumdlalo weHighpoint FC enqobe kuRenkini nge3- 0.
Abafana abatshisayo iEleven Stars bagaxe ezimbili entanjeni zegedi leBusy Bee. IMakhandeni United ihlohle ezintathu ku-FC Chelsea.
Isikhulumi seligi uMthokozisi Ndlovu uthe balokuthaba ukuthi kumaviki adluleyo amaqembu akuligi yabo asetshengisele ukuthi azimisele ukuqhuba imidlalo.
Uthe ukuzimisela kwamaqembu sekukhweza lenani labasakhulayo lezakhamizi ezibukela imidlalo.
“Abantu abanengi sebegcwalisa inkundla zethu lokhe savula isizini yalonyaka. Ukuza kwabantu kutshengisa ukuthi umkhankaso wethu wokusebenzisa ezemidlalo ukwehlisa ukumemetheka kwengculazi kuyaphambili.
“Ngempelaviki elandelayo imidlalo yethu ingena iviki lesihlanu lapho esizaqhubeka sinxusa uzulu ukuthi azosekela ithalenta eligcwele koBulawayo,” kutsho uNdlovu.
Ithimu yeHighpoint izahlangana leMakhandeni United kumdlalo omkhulu ngoMgqibelo. IZwakala Zulu inxusa iMakokoba Shooters.
UNdlovu wengeze ukuba lamantombazana ayaphatheka kumdlalo wokuqaga kodwa inkinga abalayo yikuthi asesemalutshwane amaqembu kulumdlalo.
Isabelo sakoBulawayo ngesakuqala ukuqhuba imncintiswano le ngaphansi kwe-HIV Prevention League.
Impumela yemidlalo: Zwakala Zulu 1, Makhandeni United 4; Bosso Chapters 1, Makokoba 1; Vultures 1, HP Legends 2; Highpoint 3, Renkini 0; Busy Bee 1, Eleven Stars 3; Makokoba Raiders 2, Seven Warriors 1
United Refineries 0, MaYellow 2; Makokoba United 3, FC Chelsea 0.
