uMthunywa
YiNtatheli kaMthunywa
IQEMBU likanobhutshuzwayo kuligi ka-Division One emhlubulweni ongezansi yelizwe eleHwange selisalelwe yimiklomelo emithathu kuphela ukuthi libizwe njengentshantshu yeligi le, liphenduke enkundleni zePremier League ngomnyaka ozayo.
Okwamanje iChipangano ihlezi kunombolo yaphezulu kungalane ka-Division One njalo ihlale lapho kusukela ngomdlalo wakuqala kuze kube lakhathesi.
Kusele imidlalo eyisithupha ukuthi kugqitshwe iligi le, iHwange ikhokhela ngemiklomelo emihlanu.
Iqembu elilandelayo, iTsholotsho, loba lingaze lifise ukuthi iHwange idliwe kumidlalo eseleyo, izifiso zayo zokuphenduka kuPSL zinciphile.
Bekukhangelwe ukuthi izimbamgodi ziphenduke masinyane kuligi enkulu ngenxa yokuthi zilakho konke okufunakalayo ukuthi zibalelwe kumaqembu azwayo kuleli.
Ekhuluma loMthunywa kuliviki ngemva kokulolonga abadlali, umqeqetshi weHwange uNation Dube ubike ukuba abafuni ukuziqakamisa ngokuba lethemba lokuthi sebephendukile kuPSL.
“Sidlale kuhle kusizini le. Asikafiki lapha okumele siyekhona njalo asideleli amaqembu esizahlangana lawo kumidlalo eseleyo, silungiselela yonke imidlalo ngokufanayo. Umncintiswano usesekhona.
“Okuhle kuyabukwa ngoba abadlali batshengise ukuthi sebekhangelele ukubuyela lapho okumele bebekhona, ku-PSL. Okwakhathesi angeke sivumelane ukuthi sesingenile. Inhloso yikunqoba kokuphela,” kutsho uDube.
Kusenjalo, inkampani yeNokel Security esekela imidlalo yenguqu ka-Division One isibike ukuba iyachelesa ngokubona ubungcitshi bomdlalo kanobhutshuzwayo ka-Division One emhlubulweni ongezansi yelizwe.
Umaqhuzu walinkampani uKenneth Mhlophe ubikele iphephandaba likazulu ngokusuthiseka kwabo njengabasekeli beligi le.
UMhlophe waziwa kabanzi ngokuzimisela kwakhe ukunikeza abadlali abahlohla amabhola amanengi.
Ukuhlaziywa komdlalo ka-Division One okwenziwe nguMhlophe leNokel Security kutshayisane lokuthi isizini isisiya emaphethelweni, okuveza sobala ukuthi abadlali sebedlala ibhola elijabulisa ababukeli, behlose ukuthola imivuzo.
UMhlophe uthe kasoze abuyele emuva ngoba uzahlala esekela abadlali. Uthe abadlali abakuligi ephansi le badlala ukwedlula labo abakuPSL.
“Thina njengeNokel Security siyasuthiseka ngomdlalo esiwubona kuligi ka-Division One Southern Region. Ubungcitshi esikhuluma ngabo bedlula lobu esibubona kumaqembu aphezulu. Lokhu yikho okwenza ukuthi iNokel Security iqine ngamandla wokusekela ngemali iligi le. Akwaziwa, mhlawumbe inkampani ingaqoqa umncintiswano omkhulu ekupheleni kwesizini.
“Sithembisa ukuthi sizahlala siphakamisa abadlali baka-Division One sonke isikhathi. Inhloso yethu ngeyokuthi sibonise uzulu ukuba iNokel Security yinkampani etshisekela ukuphakamisa ithalenta lesizwe kwezemidlalo,” kutsho uMhlophe.
Uqhubeke wathi okunye okubenza baqinele ku-Division One yikuthi bafuna ukwengeza isisindo somdlalo kuligi le esidonse isikhathi ingasekelwa.
“Omunye lomunye wabadlali kuwo wonke amaqembu ufuna ukuthi kube nguye othola isicoco kodwa sona asibuyi mahala nje, siyaginqelwa. Kuhle ukuthola ukuba imali esisekela ngayo iyaphathisa ukukhweza isisindo somdlalo.”
